Dili: Deputadu, José da Silva Painão ‘Folaran’ husi Bankada Konsellu Nasional Rekonstruksaun Timot Leste (CNRT), nu’udar mós veteranu Rejiaun Kuatru (autónoma) fila hikas ona ba aman Maromak nia kadunan santa hafoin hakotuk nian is moris nian iha Ospital ida iha Jakarta, Indonésia iha Domingu Kalan (16/8). 

Situasaun ida ne’e, halo faluk, oan ki’ak no familia tomak sente la fiar ho realidade ne’ebé mosu, tanba antes ne’e matebian “Folaran” iha kondisaun di’ak  bainhira hala’o vizita traballu ba Singapura. 

Iha semana ida liu ba matebian ho ninia maluk Deputadu balun hala’o vizita traballu ba Singapura, depois fila husi Singapura mai iha Jakarta matebian ho nia maluk Deputadu balun prepara atu fila mai Timor-Leste, maibe derepente matebian hetan ataka moras sofre kurasaun, ne’e duni lori ba iha ospital, maibe esforsu hirak ne’e la konsege salva matebian nia vida.

Tuir informasaun ne’ebé familia simu husi Deputadu balun ne’ebé la’o hamutuk ho matebian hateten katak, bainhira matebian hetan ataka konsege lori kedas ba ospital maibe kondisaun matebian grave tebes, ne’e duni to’o iha ospital, doutor sira tau kedas oksijéniu no halo esforsu makaas maibe ikus mai matebian tenke hakotu ninia vida moris iha kama Ospital Jakarta nian. 

“Matebian hakotu nia iis sen besik familia ida, tantu oan, fen ka maun alin ruma, tanba matebian ba iha Jakarta la’os tanba moras, maibe foin fila husi vizita traballu ida iha Singapura. “ laiha liafuan ruma maka matebian ko’alia, maibe nia (matebian) dehan de’it liafuan, ha’u labele ona,” kaben husi matebian Folaran konta tuir liafuan ne’ebé Deputadu Ancelmo hato’o liu husi telephone husi Jakarta.

Triste liu tan ba faluk no oan ki’ak sira, tanba antes rona matebian hetan moras no lori ba iha ospital, matebian sei telephone ba ninia kaben no fo mos parabéns ba ninia oan feto Akika ne’ebé halo tinan iha loron ne’e.

Daudauk ne’e mate isin Deputadu José da Silva ‘Folaran’ to’o ona iha Bali no hein katak ohin (18/08) atu lori mai Timor. Mate isin sei tau iha Bidau Toko Baru hodi hein prosesu funeral.

 “Apa ha’u la simu realidade ida ne’e, tanba ami sei prezisa apa nia domin mai ami oan sira ho mama. Ami senti lakon buat boot ida. Papa ba mos la hato’o netik liafuan mai ami, husik is mos la iha ami nia let. kasian apa,,o lahadomi ona ami maka o ba nonok deit ne’e, papa ami hakarak papa la’o maka mai, lakohi haree ema leba papa maka lori mai” dehan Lizhe Ribeiro oan feto boot husi matebian Folaran haktuir iha via face book.

Tuir observesaun Jornalista sira iha matebian ninia uma nota katak, daudauk ne’e familia sira komesa hala’o ona preparasaun hanesan halo tenda, foru meza no atividade sira seluk hodi hein prepara atu simu mate isin ne’ebé to'o iha Dili, loron ohin, Tersa (18/08). Bazeia ba informasaun ne’ebé iha mate isin sei to’o iha Dili mais ou menus tuku 14 : 00 Otl. Aleinde ne’e, movimentu iha matebian nia uma ema barak maka komesa tama sai, hahú husi ninia kolega Deputadu sira, veteran no membru governu balun. 

Iha Parte seluk, mesmu diferénsia partidu maibe sentimentu triste nu’udar umana nunka atu lakon, hahalok ida ne’e Deputadu Bankada Fretilin, Eládio Faculto hatudu iha Uma Fukun Parlamentu Nasional bainhira rona Deputadu José Painão da Silva ‘Folaran’ hakotu ninia vida moris iha Jakarta, Indonésia (16/8).

“Aproveita oportunidade ida ne’e, ha’u hato’o sentidu kondolénsia ba familia tomak, liu-liu ba faluk no oan ki’ak sira ne’ebé ohin loron simu hela konsekuénsia boot ida ne’e. Ha’u mós sente triste tanba sente lakon ema di’ak ida, patriotiku no nasionalista di’ak ida” dehan Deputadu Eládio ba Jornalista sira iha Uma Fukun Parlamentu Nasional, Segunda-Feira, (17/8).

Hanesan jerasaun foun, Deputadu Eladio rekoñese katak matebian Deputadu José da Silva ema ida ne’ebé koñesidu no serbisu makaas iha prosesu luta ba ukun rasik an. Iha prosesu luta ba ukun rasik an ne’e matebian hamutuk ho kamarada no kompaiñeru Keranuk, Aquelino, atual Deputadu David Dias Ximenes no kompaiñeru sira seluk hodi hala’o serbisu iha Frente Polítiku Internu (FPI).

La’os de’it ida ne’e, tanba molok harii FPI antes ne’e matebian ‘Folaran’ hala’o ona serbisu Frente Klandestina nian hodi fó apoiu makaas ba Frente Armada hodi luta ba rai doben ida ne’e. Tan ne’e envolvimentu José da Silva “Folaran” ba luta liberatsaun difisil tebes atu sura tanba nia fó didikasaun tomak ba rai ne’e no nia nunka deskansa nomos la sente kolega bainhira hala’o ninia serbisu ba rai doben ida ne’e atu liberta an. 

Ohin loron, nia hakotu vida tanba impaktu husi moras ne’ebé afeta ba ninia saúde tanba hetan torturasaun iha tempu pasadu. Depois hala’o ezersisiu hodi liberta rai, nia (Folaran) tenke hala’o mós ezersisiu bo’ot ida oinsá atu liberta ninia vida husi moras, maibe realidade hatudu ninia ezersisiu ida ne’e to’o de’it loron ida ne’ebé nia hakotu vida.

Eládio haktuir katak matebian mai husi Fretilin, maski iha evolusaun demokrasia nia laran hili dalan ba partidu seluk, maibe ida ne’e tanba ita hotu hakarak haburas demokrasia iha rai doben ida ne’e.

“Ninia partisipasaun no kontribuisaun ba luta libertasaun fó ezemplu di’ak ba jerasaun foun sira atu la’o tuir, tanba sakrifisiu ne’ebé sira halo bo’ot liu sakrifisiu ne’ebé agora ita jerasaun foun halo. Posibilidade tomak nia rai modelu ida ne’e mai ita, ne’e duni ita tenke sakrifika an ba ida ne’ebé maka di’ak atu bele resolve problema povu nian, liu-liu oinsá atu kore povu husi ki’ak no mukit tanba ida ne’e sai hanesan mós prinsipiu matebian nian.” Eládio esklarese.

Maski la hamutuk ona ho ita, maibe Deputadu Eládio kontinua husu ba matebian “Folaran” atu kontinua tau matan nafatin ba povu no rai doben ne’ebé nia hadomi no defende, atu nune’e iha futuru rai Timor bele sai di’ak. 

Eládio hatutan katak matebian ema ida ne’ebé kalma, la iha ambisaun no la gosta envolve an iha kualker asuntu ida, maibe nia iha resposabilidade boot hodi hala’o serbisu no nunka abandona ninia serbisu.

“Ha’u nia hasoru malu ikus ho nia iha momentu atu hala’o preparasaun ba Moçambique, tanba iha momentu ne’ebá sira foti ha’u hanesan xefe delegasaun no matebian ‘Folaran’ sai hanesan ha’u nia Vise, mesmu nia hanesan veteranu ida, maibe nia nunka iha ambisaun ba pozisaun ruma no úniku liu nia sempre deposita konfiansa, konpoténsia ba jerasaun foun sira kontinua atu ezerse serbisu ida ne’e ho di’ak ba oin no nia la destinge husi parte ne’ebé de’it tanba ba nia ema hotu-hotu diak..” Eládio esplika ho triste.

 

  • 0 comment
  • Read 1706 times

Leave a comment



Anti-spam: complete the taskJoomla CAPTCHA

About us

Depois Presidente Fretilin Nicolau Lobato mate iha 31 Dezembro 1978, Funda­dor Fretilin no membru Comite Central Freti­lin ne’ebe salva a’an iha rai liur “ la iha tan mehi ba ukun a’an”. Tamba husi 31 Dezem­bro 1978 to’o 1983, iha tinan 5 nia laran, Fundador Fretilin lahatene los se mak bele hatutan funu ne’e. Mari Alkatiri hanesan mos fundador Fretilin ida, ba Jurnalista Timor Post iha dia 04 Janeiro 2010 hateten katak “wainhira rona katak Nicolau Lobato mate, ami dehan agora saida mak atu akontese, ami komesa hare senariu bara-barak se mak atu troka Nicolau Lobato..

Contact us

Informasi seputar kegiatan Partido CNRT, silahkan hubungi salah satu kontak di bawah ini:

  • Address : Dili Timor Leste

  • Email : This email address is being protected from spambots. You need JavaScript enabled to view it.

  • Phone1 : +67078461438
    Phone2 : +67077846639

OJP, KMP & KP