Print this page

ZUMALAI- Militante Partidu Congresu Nasional Rekonstruksaun de Timor Leste (CNRT) iha Postu Administrativu Zumalai, Municipiu Covalima promote sei hili deit partidu CNRT too mate.

Tuir militante CNRT Zumalai, Adriano da Concecao ba jornalista sira iha kampania partidu CNRT ba loron sigundu neebe halo iha Kampu Eskola Pre Sekundaria Zumalai, Postu Administratativu Zumalai, Municipiu Covalima hatete laiha partidu seluk mak atu halo dezenvolvimentu hanesan ho partidu CNRT iha rai ida nee.

“Laiha duvidas ba ami Zumalai tanba realidade ami hare ona ho matan no sente ona dezenvolvimentu neebe halo husi CNRT, tanba nee ami promote sei la hili partidu seluk. Mate ka moris ami hili CNRT hodi fo votus ba maun boot Xanana atu kontinua ukun hadia povu nia moris maske neneik,” dehan Adriano.

Nia hatutan, partidu seluk tuir nia haree seidauk iha kapasidade atu ukun. Satan partidu kiik neebe foin harii hodi halo promesa falsu tun sae iha komonidade nia let.

Nunee mos Felisberto Amaral, mos hatete povu tomak iha Timor laran haree ho matan ona dezenvolvimentu neebe mak Xanana Gusmao halo ona ba rai ida nee tanba nee kuandu la hili CNRT hanesan estraga future oan sira nian.

“Povu tomak haree ho matan no sente ona saida mak maun boot halo ona ba rai ida nee. Ita labele nega tanba povu mos sente ona dezenvolvimentu hanesan eletrisidade, estrada, bee mos no seluk tan liu-liu projetu boot iha Suai. Tanba nee see la hili CNRT hanesan ita esraga ita nia oan sira nia future,” hatete Felisberto.

Nunee mos Prezidente CNRT, Xanana Gusmao hatete, CNRT mak bele garante dezenvolvimentu ba povu, laiha tan partidu seluk tanba nee labele hili sala iha eleisaun mai.

“Hau hatete ba ita boot sira. Hau mesak sei labele tanba nee mai ita hamutuk lori rai nee ba oin. So CNRT mak bele dezenvolve rai ida nee. So CNRT mak bele lori povu ba moris diak tanba nee lalika iha eleisaun fulan oin mai lalika hili sala. vota CNRT vota ba future Timor nian,” dehan Xanana.

  • 0 comment
  • Read 350 times