Redaksi

Redaksi

Dili: Prezidente Parlamentu Nasional nia Aktu sira viola Rejimentu Parlamentu Nasional (RPN)

Prezidente Parlamentu Nasional nia kompetensia tuir artigu 17 Rejimentu do Parlamentu Nasional mak hanesan tuir mai: a) prezide meza, b) marka sesaun plenaria no fiksa ordem do dia tuir hakerek iha Rejimentu Parlamentu Nasional (RPN) hafoin rona tiha konferensia neebe reprezentante Bankada parlamentar, c) organiza sesaun plenaria, d) admite ka rejeita projetu no proposta de lei ka rezolusaun, projetu deliberasaun no rekerimentu, hafoin verifika tiha ninia regularidade rejimental, la taka dalan ba direitu rekursu ba plenaria, f) mantein ordem disiplina no seguransa Parlamentu Nasional nian, i) promove publikasaun ba debate, ba trabalho no aktu hotu-hotu PN nian, j) konvoka no prezide konferensia reprezentante bankada parlamentar sira.

Ho baze ba pontus hirak iha leten, aktu Prezidente Parlamentu Nasional nian horiseik (Segunda feira, 8/1/2018) iha primeira sesaun plenaria tinan 2018 hatudu katak Prezidente Parlamentu Nasional nia intensaun la marka prezensa no lakohi prezide plenaria ordinaria ida nee nuudar violasaun ba artigu 46 no. 1 pontu a. Nebe hatete katak “Reuniaun plenaria halao iha loron segunda no tersa feira,” no artigu 17 Rejimentu Parlamentu Nasional nuudar temi iha leten.

Deputadu sira husi AMP lamenta tebes ho atitude hosi Prezidente Parlamentu Nasional nee tanba konstitui violasaun grave ba Rejimentu Parlamentu Nasional. Karik Prezidente Parlamentu Nasional laiha ona vontade atu prezide plenaria tuir Rejimentu Parlamentu Nasional haruka, maka tuir loloos Prezidente Parlamentu Nasional bele delega ba Vise Prezidente sira, bazeia ba artigu 22 Rejimentu Parlamentu Nasional hodi halao funsionamentu normal Parlamentu Nasional (PN) nian.

Karik Prezidente Parlamentu Nasional laiha vontade atu jere meza PN, ami sujere ba Prezidente Parlamentu Nasional tama ona ba ajenda destituisaun hodi entrega hikas ba ema seluk, duke abandona deliberadamente fali plenaria no blokeia funsionamentu normal PN nian. Aktu ida nee la valoriza privelejiu sira neebe mak estadu atribui ba Prezidente Parlamentu Nasional, nudar segundu orgaun soberania estadu nian.

Prezidente Parlamentu Nasional hatoo pedidu fiskalizaun abstrata konstitusionalidade ba norma neebe hatuur momoos ona iha artigu 15 (2) Rejimentu Parlamentu Nasional ligadu ho proposta destituisaun neebe mai husi AMP, felizmente Tribunal Rekursu (TR) deklara katak laiha inkonstitusionalidade (aktus AMP la viola konstituisaun) iha desizaun NUC N.0129/17.TRDIL data 05/01/2018. Antes desizaun TR nian fo sai, Tribunal Distrital Dili (TDD) mos indifere (rejeita) pedidu da providensia kautelar husi PPN.

Dala ida tan Prezidente Parlamentu Nasional husu rekusru ba desizaun TDD nian neebe indefere ka rejeita pedidu Providensia Kautelar neebe mak Prezidente Parlamentu Nasional hatama ba TDD iha 3 janeiru 2018 nee, laiha ona baze legal, tanba TR hasai tiha ona desizaun, katak Fiskalizasaun Abstrata, neebe mak Prezidente Parlamentu Nasional hatoo kontra pedidu AMP nian kona-ba destituisaun Presidente Parlamentu Nasional nee konstitusional. Ho nunee Prezidente Parlamentu Nasional nafatin haksumik (subar-an) iha prosesu legal nia okos hodi manipula prosesu politika neebe loloos no lao tuir lei. Ida nee hatudu deit laiha baze legal ba PPN atu foti kualker aktu teatrikal nebe subar iha aspektu legal nia mahon hodi halai subar hosi processu normal iha Parlamentu Nasional.

AMP respeita tebes desizaun tribunal sira nee no husu atu PPN tenki mos respeita decizaun nebe Tribunal hasai ona. Ho faktus sira nee hotu, laiha tan razaun ba Prezidente Parlamentu Nasional atu la ajenda rekerimentu rua nebe mak AMP submete tiha ona, no Prezidente Parlamentu Nasional admite tiha ona hahuu kedas ho mosaun sensura no proposta destituisaun ba PPN.

AMP mos lamenta akontesimentu iha plenaria PN horiseik dader (Segunda feira, 8/1/2018), nebe Prezidente Parlamentu Nasional delega deit Secretaria da Meza PN, hodi ba loke plenaria no mos halo leitura ba dokumentus tolu hanesan tuir mai:

  1. Ajendamentu ba debate da mosaun sensura ba Governu;
  2. Karta pedidu husi Bankada Parlamentar KHUNTO, ho asuntu ba ajendamentu ba a) diskusaun no votasaun ba mosaun sensura ba VII Governu Konstitusional; b) diskusaun no votasaun ba proposta destituisaun ba Prezidente Parlamentu Nasional, no ikus liu mak;
  3. Rekursu Agravu Suspensivu Prezidente Parlamentu Nasional nian ba Tribunal Distrital de Dili (karta refere Deputadus AMP sira la konsege le nia konteudu tanba kopia karta nee ho kualidade la mos/letras malahuk los).

Aktus hirak neebe hatudu dadauk husi Prezidente Parlamentu Nasional nee, hatudu momos katak Prezidente Parlamentu Nasional kontribui ba dada tempu, hodi nunee bele atinji objetivu politiku partidaria FRETILIN nian, hodi kria krize institusional nuudar razaun ba Sua Excia. Prezidente da República hodi bele dessolve PN no deklara Eleisaun Antisipada.

Mosaun Sensura ba Governu no Destituisaun ba PPN Bazeia ba karta neebe Prezidente Parlamentu Nasional ho numeru referensia 87/PRES/2017, neebe hatoo ba VII Governu Konstitusional, iha loron 3 Janeiru 2018, ho asuntu atu halo ajendamentu ba debate Mosaun Sensura ba Governu. Karta refere informa ba Governu hodi husu Governu nia disponibilidade atu mai atende ajenda debate mosaun sensura iha Parlamentu Nasional. Prezidente Parlamentu Nasional mos sita iha karta refere katak, sei fiksa data ba debate Mosaun Sensura nian la liu husi loron tolu nulu, hahu husi loron 18 Dezembru 2017, maske Rejimentu Parlamentu Nasional la koalia kona-ba limitasaun tempu ba debate mosaun sensura nian.

Iha artigu 140 Rejimentu Parlamentu Nasional kona-ba Mosaun Sensura iha duni fatin no nune mos tuir artigo 138 Rejimentu Parlamentu Nasional tempu ba debate plenaria nian labele liu husi loron tolu. Por enkuanto, Prezidente Parlamentu Nasional manipula hodi la fo konsiderasaun loloos ba karta ba mosaun sensura neebe hatama husi AMP iha loron 20 Novembru 2017. Dala ida tan Prezidente Parlamentu Nasional tenta hela dada nafatin tempu.

Ironiku liu maka Prezidente Parlamentu Nasional admite proposta mosaun sensura AMP nian iha loron 20 Novembru 2017, infelizmente Prezidente Parlamentu Nasional foin haruka karta ba VII Governu Konstitusional (PM) iha loron 3 Janeiru 2018, hodi konta fali hahu husi loron 20 Dezembru 2017. Dala ida tan Prezidente Parlamentu Nasional tenta dada nafatin tempu hodi kria krize institusional.

AMP Prontu fo solusaun ba situasaun politika nasional a. Formasaun VIII Governu Konstitusional Problema impasse politiku neebe akontese dadauk nee tanba governu minoriatario laiha apoiu maioria parlamentar. AMP mak iha kondisoens hodi garante estabilidade governativa nuudar xave ba prosesu dezenvolvimentu nasional. AMP komprometidu atu fo solusaun lalais ba funsionamentu estadu ba povu nia moris, liu husi:

  1. Formasaun governu;
  2. Aprovasaun programa neebe diak liu ba povu;
  3. Aprovasaun Dekretu Lei kona-ba organika governu;
  4. Aprovasaun Orsamentu Jeral Estadu 2018.
  5. Eleisaun Antisipada (EA) EA la’os desizaun neebe diak ba dezenvolvimentu nasional ho razaun hirak tuir mai:
  6. EA sei perturba povu nia atividade normal ba moris diak;
  7. Seidauk iha lei ida mak regula kona-ba EA;
  8. Laiha razaun konstitusional atu disolve PN hodi hakat ba EA;
  9. Laiha orsamentu propriu ba EA;
  10. Laiha OGE 2018 hodi sustenta povu nia moris, liu husi: salariu ba funsionariu públiku, PNTL, F-FDTL, Veteranus, Idozus, selu projetu sira, etc. durante tinan 2018;
  11. Laiha esperiensia EA dezde estadu RDTL ezisti, maske hasoru krize politiku iha 2006. EA sei hamosu presedente neebe ladiak ba vida politika iha futuru;
  12. Karik rezultadu EA sei lori ita ba situasaun impase politiku hanesan agora, sera ke ita tenki halo bebeik Eleisaun Antisipada?;

Atu garante no hasees hosi risku no implikasaun hirak ne ba povo no estado maka AMP reitera nia prontidaun hodi assume responsabilidade governativa ho lideransa Kay Rala Xanana Gusmão ho Taur Matan Ruak bainhira Prezidente da Republika fo fiar atu kaer VIII Governu Konstitusional.

Maski nune karik Prezidente da Republika decide tuir vontade Sekretario Geral Fretilin Mari Alkatiri nebe koalia bebeik iha media sosioal konaba eleisaun antesipada maka AMP prontu atu partisipa no garante sei hodi vitoria ba povo tomak hamutuk ho Kayrala Xanana Gusmao, Taur Matan Ruak, Jose Naimori Bucar no entidade politika seluk neebe hanoin hanesan ho AMP hodi defende Konstituisaun RDTL.

 

Sosiadade Timorense tomak maka ami respeita no hadomi, Liu husi biban ida nee, Bancadas AMP hakarak hatoo ba publiku, katak PN horseik Tersa feira, 19 Dezembru 2017 debate no aprova tiha ona rekursu ba admisaun PPL OR 2017 neebe PPN halo hodi baisa ba comisaun espesializadas PN, ho aprovasaun recursu neebe Bancadas AMP aprezenta maka automatikamente Proposta de Lei Orçmento Rectificativo (PPL OR) 2017 rejeitadu. Hanesan ita hotu hatene, antes nee mos PN la prova PPL OR 2017 ho karater urgenti tanba la priense rekezitus urgenti sira neebe VII Governo deskreve.

Razaun sira PN rezeita PPL OR ho carater urgenti no mos karater normal maka VII Governo seidauk aprezenta fali programa governo ba daruak tuir mandatu konstitusionais, maibe adianta fali mak proposta PPL OR 2017. Nunee Bancadas AMP hakarak esklarese loloos, razoens fundamentais sira hodi rejeita , hanesan tuir mai nee:

  1. Governo submete PPL OR 2017 antes PN diskuti Programa VII Governo Constitucional ba faze daruak. Governo tenki submete uluk programa ba daruak iha loron 30 nia laran hafoin programa governo neebe aprezenta dahuluk rejeitadu iha loron 19 Outubru 2017. Konta husi 19 Otubru 2017, tuir lolos iha 19 Novembru 2017, maximu Governo submete hikas progrma ba daruak;
  2. VII Governo Constitucional failha atu aprezenta materia relevantes hodi justifika sira nia argumentu “karater urjensia” iha PPL OR neebe submete mai PN. AMP nota, katak VII governo uza razaun karater urgente ba PPL OR ho objetivu hases-an husi regras konstitusionais;
  3. Wainhira submete PPL OR 2017 ba PN, VII Governo Cosntitucional failha atu kumpri regras Regimento Parlamento Nacional (RPN). Governo mos failha atu fornese dokumentus importante relasiona ho PPL OR 2017, nuudar referensia ba Deputados atu estuda didiak hodi diskuti iha proposta lei refere;
  4. VII Governo failha atu submete justifikasoens husi artigo 9, alinea d, Lei no. 9/2005, 3 Agusto kona-ba Fundo Petrolifero neebe altera husi Lei no. 12/2012, 28 Setembru kona-ba Fundu Petrolifero;
  5. Presidente PN ho bancadas koligasaun VII Governo hatene muito bem, katak wainhira PN aprova PPL OR 2017, sem dokumentus justifikasaun (sita ona iha pontu 4), mak alterasaun ba PPL OR 2017, konsidera inkonstitusional. Dokumentus justifikasaun hanesan mos Bancada FRETILIN ezizi iha tinan 2008 (iha debate PPL OR no OGE);
  6. VII Governo Constitucional mos hatene, wainhira submete proposta OR iha Novembru 2017, orsamentu sei laiha efetu, tanba deliberasaun ba orsamentu 2017 sei validu too deit 31 Dezembru 2017. Ho tempu limitadu nee oinsa Governo atu ezekuta 200 milhoens iha semana rua nia laran?
  7. Hahu 10 Novembru 2017, wainhira Presidente PN deklara iha Conferencia Lideres bancada (CLB), katak Governo submete PPL OR ba 2017 Bankada CNRT deklara kedas kontra, ho razaun:
  8. a) Saldu OGE sei iha balansu pro-volta 265 milhoes, no tuir Lei Gestão Finançeira. Ministro Plano e Finanças bele jere tuir artigu 37º hodi taka orsamentu neebe menus iha menisteriu ka orgaun autonomas balu nian.
  9. b) Kompromisus neebe komprometidu ona tuir kontratu neebe halo ona husi VI Governo Constitucional bele tau hamutuk iha OGE 2018 nian. Liliu kompromisus sira neebe labele selu ho OGE 2017, ka bolu tranzita ba tinan tuir mai tamba kontratu hirak nee barak liu multi-anual;
  10. c) Atu kobre no asegura Estadu Timor-Leste nia moris em geral, ita labele rezolve ho orsamentu retifikativu, tamba PPL OR 2017, neebe governo propoem atu selu kompromisius, laos dividas, hanesan governo deklara beibeik ona, sa tan hodi selu salariu ba funsionarius kontratadus sira. NEE LA-LOS!..
  11. d) Bancadas AMP konsidera importante liu mak governo submete OGE 2018, hodi finansia salariu-vensimentu, Bens e Serviços, Transferências, Capital Menor, no Capital Desenvolvimento ba tinan tomak. Maibe VII governo hatene hela katak falta deit semana rua tinan fiskal 2017atu remata ona. Maibe VII Governo la prekupa ho OGE 2018.
  12. Mezmu ho karater urjensia PPL OR 2017, tenki kumpri regras legais neebe iha. Labele uza liafuan ho karater urjensia hodi haksoit liu fali regras konstitusionais neebe ezisti. Tamba tuir artigu 2 no. 2 CRDTL, orgaun hotu-hotu tenki hakruuk ba regras konstitusionais sira, se lae ita sei hatoman-an ho aktus inkonstitusional sira, no sei husk hela presedente la furak ba futuru.
  13. Perante debate ba Rekursu Admisaun ba PPL OR 2017, horiseik (19 Dezembru 2017), Bancadas bloku koligasaun VII Governo, hatudu aktus estra-ordinariu tebes, wainhira lao sai (walkout) husi plenaria, hodi la partisipa iha sesaun votasaun. Aktus ida nee hatudu katak, sira lakon konfiansa ba Presidente PN neebe sira rasik mak hili. Pergunta bot mak nee: “se Bancadas Koligasaun VII Governo defende politika OR ba povu nia vida no sustentabilidade estadu, tanba sa mak tenki walkout, tanba la mantein hodi defende proposta ida neebe VII governo rasik mak propoen?”

Faktus importantisimu balun neebe Bancadas AMP rejista hela perante Debate horseik neebe ami persiza sita iha nee maka deklarasaun Ministru Saudi Rui Maria de Araújo (eis PM VI Governo Constitusional) kona-ba Hospital Sanglah iha Bali neebe komesa dia 1 Janeiru 2018, sei la halo ho tratamentu saudi ba pasientes husi Governo TL, Eis-PM nee deklara katak Hospital husu ona ba nia atu asina deit akordu ekstensaun kontratu ida para Hospital bele kontinua simu pasiente husi TL maibe Minsitru Rui Maria de Araújo rasik maka lakohi asina akordu nee tanba razaun orsamentu sidauk iha. Bancadas AMP lamenta no kontra pozisaun MS nian nee tanba akordu nee halo entre estado TL ho Hospital Sanglah, hodi Estado TL nia naran, Governo bele troka maibe estadu lao, no makina estado kontinua funsiona.

Iha debate plenária horiseik mos Ministro Plano e Finanças Dr. Rui Gomes rasik deklara ona katak, osan atu sustenta funsionamentu makina estadu sei iha too loron 31 fulan Dezembru. No hahu hosi fulan Fevreiru too marsu sei bele uza osan duo desimu. Husu ba funsionariu tomak atu lalika preokupa ho informasaun neebe lansa iha publiku katak governo laiha ona osan atu selu funsionariu sira. Se governo lakohi renova kontratu ba funsionariu temporariu sira, entaun ida nee desizaun politika, laos konsekuensia husi falta ka laiha osan.

Bancadas AMP sei iha inisiativa legislativa ida neebe sei aprezenta iha tempu badak hanesan Prozetu de Lei (PJL) “Rejime Tranzitoriu ba ezekusaun duadecimal,” inisiativa ida nee atu komplementa regime duadecimal neebe vigora hela, hodi nunee Governo bele halo jestaun iha situasaun ekstraordinaria sira hanesan formasaun governo neebe tarde no perturba siklus orsamental estado atu asegura gestaun finanseira too orsamentu geral do estadu 2018 tama em vigor. AMP mos la konkorda atu halo alterasaun ba Lei Gestão Finançeira, Lei Fundo Petrolifero, no mudansa ano fiskal.

VII Governo Constitucional sempre deklara katak osan laiha, maibe kuaze ministerio lobuk ida iha governasaun atual, bele selu Apoiu Asesoaria Internasional sira ho montante salariu provolta $ 10.000 too $ 14.000 Dollares Americano. Situasaun ida nee hatudu, katak orsamentu estadu sei iha hela.

Alein de nee regime ida nee mos bele kontinua garante maquina estado ba asuntus sira urgenti hanesan kestaun stok aimoruk iha hopsital, combutivel ba geradores sentral eletrisidade no kestaun sira relasaun ho defeza e siguransa nian. Regime ida nee sei termina imediatamente wainhira OGE 2018 vigora ona.

Obrigadu barak.

HISIK KOSAR BA MORIS DIAK

TANE O RAIN, TANE O EMAR, TANE O LISAN

FIAR AN LAO BA OIN

 

 

Wednesday, 13 December 2017 00:00

Komunikadu Imprensa

“Resposta ba karta Presidente Parlamento Nacional (PPN) kona-ba Proposta destituição husi AMP ba Presidente Parlamento Nacional”

Liu husi deklarasaun ida nee, Aliansa Maioria Parlamentar (AMP) hakarak halo klarifikasaun no fo resposta ba karta Presidente Parlamentu Nasional nian neebe haruka ba bancada parlamentar CNRT, PLP e KHUNTO iha Sigunda feira, 11 Dezembru 2017.

Alianca Maioria Parlamentar, hakarak esplika sequencia violasaun ka Iregularida sobre incomprimento Regimentu Parlamentu Nasional (RPN) nebe Presidente Parlamento Nacional Dr. Aniceto Longinhos Lopes Guterres komete no ikus mai hodi Deputado nain 12 hato sira nia Proposta Destituisaun, konforme art. 16-B. no 2 nudar acto ida regimentais neebe nudar proceso ka procedemento nebe normal.

Acto ida ne, deputados sira hato tamba tuir Requerentes nia observasaun, katak Presidente Parlamento Nacional gere orgaun soberania ida ne la iha ona inparsialidade e la onesto tuir Regimento nudar regras nebe guia funcionamento parlamento nudar Orgaun Soberano.

Deputado Bloco Alianca Maioria Parlamentar laiha intensaun atu defama ka hatun Honra Dr. Aniceto Longinhos Lopes Guterres nia dignidade pessoal maibe ami halo asaun hasoru Presidente Parlamento tamba la halo tuir kompetencia nebe RPN atribui ba Presidente Parlamento Nacional hodi gere Institusaun nee, maibe nia uza sala hodi halo abusu poder ho Kontra Regulamento Interno Parlamento Nasional nian.

Iha Karta Declarasaun ne Ami Bancada Tolu nebe iha Bloco Alianca Maioria Parlamentar hakarak fo sai ba publicu, liu-liu ba povo doben Timor Leste tomak, atu bele hatene hahalok abuso de Poder nebe PPN halo hanesan Tuir mai nee:

  • Presidente Parlamento Nacional hahu Baixa Admisaun Orsamentu Rektifikativu ho Karakter Urgente husi VII Governo ba Comisaun Financas Publicas iha loron 10/11/2017 sem Informa ba Liders das Bancadas tuir pratika nomal iha parlamentu. Iha 10 Novembro iha konvokatoriu ba reunião Lideres das Bancadas mak Presidente Parlamento Nacional foin informa ba lideres Bankadas katak sei aguarda nota teknika antes baixa ba Komisaun C;
  • Relatorio husi Comissaun C ba pedido de Urgência, chumba iha Comissaun C. Nune iha konferencia dos lideres loron 17/11/2017, Presidente Parlamento Nacional informa katak atu lori ba ajendamentu plenaria iha loron 20/11/2017;
  • Iha plenari loron 20/11 iha ordem do dia PN rezeita atu debate Orsamentu Rektifikativu ho carater urgencia liu husi votasaun;
  • Iha plenaria dia 20 de Novembro mos, Bancadas Oposisaun hatoo Declarasaun Politica hodi hatoo Moçao de Censura ba Governo, relaciona ho Programa de Governo nebe la submete hikas fali iha dia 19 nebe halo fulan ida (loron 30) depois de primeira apreciação Parlamento Nacional (oposisaun) rejeita tiha programa refere, mosaun sensura nee laos aktus foun ida tanba iha periode Sigundu Legislatura PN tinan 2009 PN halo mos mosaun hanesan ba IV Governu Constitusional ba asuntus interese nasional tuir Constituição RDTL no Regimento Parlamento Nacional haruka. Nune mos iha loron hanesan Bancadas Oposisaun hatoo mos recurso baseia ba artigo 99.2 relaciona ho PPN nia admissaun e baixa ba Comisaun C. Ba PPL Lei Orsamentu Rektifikativu;
  • Depois de apresentação carta rua (Mosaun de Sensura no Rekursu) ho karater urgensia tuir artigu 56º, 13º, 9º no 99º no.2, 3 no 4 Rrgimento Parlamento Nacional nian, Presidente Parlamento Nacional admite tia no anuncia katak sei convoca Lider Bancada ba dia seguinte 21 de Novembru atu hare agendamento ba carta rua ne’e, mesmu Bankadas proponentes ezije beibeik iha reuniaun dos lideres atu agenda maibe Presidente Parlamento Nacional la konsidera too agora.
  • Dia 21 Nov.dader Presidente Parlamento Nacional bolu Bancada Oposisaun rua CNRT ho PLP atu koalia kona ba agendamento Moção de Censura no Recurso, nune PPN propõe atu la necessário debate ou agenda Recurso, ho konta katak iha debate Orsamentu Rektifikativu na generalidade maka Bancada Oposição vota kontra no autómaticamente hela prejudicada Orsamentu Rektifikativu nee. No Presidente Parlamento Nacional sei husu atu la precisa convoca Lider Bancada ba loron refere¸maibe Bancada CNRT ho PLP propõe atu mantêm ho convocatório ba loraik dia 21.
  • Iha Lider Bancada loraik dia 21 de Nov. ho presença Ministro Presidençia Conselho Ministros, discussaun naruk sem efeito ba agendamento, embora Presidente Parlamento Nacional propõe data tentativa dia 4 de Dezembru ba Recurso, Bancadas Oposição discorda tamba Recurso baseia ba artigo 99 no. (2) (3) (4) atu bele submete ba plenaria e votação kedas, Presidente Parlamento Nacional mak deklara iha Plenaria katak atu konvoka reuniaun lideres bankadas hodi hare ba agendamentu rekerimentu rua nee. Ba Moção de Censura, Presidente Parlamento Nacional propõe data tentativa dia 18 de Dezembru, dala ida tan Bancadas Oposisaun rejeita tamba tempo atu submete programa do Governo ba dalarua maka fulan ida, tuir konstituisaun artigu 108º. Conclusão nebe PPN foti iha Lider Bancada ne mak dehan Bancadas Oposisaun questiona nia competencia hodi nune nia (Presidente Parlamento Nacional) sei prepara nia defesa. Tuir lolos Presidente Parlamento Nacional tau ba agenda no bele halo nia defeza iha Plenaria, laos uza razaun nee hodi dada angendamentu ba Rekursu nee;
  • Dia 22 de Novembru ami Bancada Oposisaun husu audiencia ho Presidente Parlamento Nacional atu esclarece kona ba Recurso nebe hatoo baseia ba artigo 99, relaciona ho admissão e baixa ba Comisaun C kona ba PPL de Lei OR. Audiencia refere Bancadas Oposisaun hatoo mos carta ida data 21 de Novembru husu atu iha convocatório ba Lider Bancada iha dia 24 de Novembru nomos pedido ba debate de urgência ba Moção de Censura, baseia ba artigo 56 do RPN. Iha reunião refere Bancadas Oposisaun propõe atu iha plenaria extra-ordinaria ida ba dia 30 de Novembru ou dia 1 de Dezembru atu agenda Recurso nebe apresenta. Ikus liu Bancadas Oposisaun entrega ka submete ba competência Presidente Parlamento Nacional nian atu halo agendamento tuir nia knar nebe regula iha art. 17 RPN. Infelizmente too dia 30 de Novembru la iha informação, nunee mos dia 1 de Dezembru la iha informação ruma kona ba convocatorio Lideres das Bancadas;
  • Orgaun as liu Parlamentu Nasional nian mak Plenaria laos Presidente Parlamentu Nasional, Presidente Parlamentu Nasional halao nia knar tuir deit rejimentu artigu 17º, prezide, organiza no reprezenta Parlamentu Nasional, maibe desizaun hotu-hotu tenki hakotu iha Plenaria, laos Presidente Parlamento Nacional mak deside rasik deit;
  • Nunee mos, tuir Konstituisaun artigu 94º, Deputadus sira la responde sivil no kriminalmente ba nia opiniau nebe nia hatoo durante halao nia knar, artigu 69º Prinsipiu separasaun de puderes. Tamba nee Presidente Parlamento Nacional la iha razaun atu hatoo reklamasaun ba Tribunal de Rekursu no Tribunal Distrital Dili tamba nee aktu politiku ida nebe halao iha internu Parlamentu Nasional nian nebe regula iha Regimentu Parlamentu Nasional.

Sekuensia sira hodi lori Bancadas Opozisaun Maioria aprezenta Mosaun Sensura, Rekursu ba PPL OR 2017 no Rekerimentu atu Husu Destituisaun Presidente Parlamento Nacional:

  1. Bancadas Opozisaun apresenta recursu ba prosesu andamentu ba Orsamentu Rektifikativu neebe halo husi Presidente Parlamentu Nasional neebe considera la necessariu ona atu halo diskusaun no aprovasaun ba Orsamentu Rektifikativu nem ho carater normal tanba kestaun legalidade VII Governu neebe ninia programa seidauk passa iha Parlamentu Nasional;
  2. Bancada opozisaun maioria submete iha plenária Parlamentu Nasional mosaun sensura ba atus governu nian neebe la kumpri regras constitucionais tuir interpretasaun paralela Artigo 9.1 (a) Codigo Civil ho Jurisprdensia seluk, hodi ses husi obrigasaun atu submete programa ba sigunda vez;
  3. Bancada opozisaun apresenta karta destituisaun ba Presidente Parlamentu Nasional tanba Deputado sira lakon tiha ona komfiansa politika neebe Presidente Parlamentu Nasional hetan. Atus destituisaun PPN nee laos foun, tanba iha fulan Maio 2016 III Legislatura halo tiha ona destituisaun ba Presidente Parlamento Nacional nomos membrus da meza PN iha tempu neba bazeia ba Regimento Parlamento Nacional;
  4. Presidente Parlamentu Nasional liu husi comferensia líderes bancadas la acomoda tiha ona eziztensia bancadas Opozisaun tuir artigu 70º no.2 Konstituisaun nian hodi kontribui ba funsionamentu normal Parlamentu Nasional nian no ses husi possibilidade plenari sira atu bele halo desizaun iha plenária ba pedidu sira bancada Opozisaun apresenta ba Presidente Parlamento Nacional.

Presidente Parlamentu Nasional fo resposta ba karta destituisaun husi deputado sira hodi adianta liu kedas ba Tribunal Rekursu atu husu Fiskalizasaun abstratu ba iniciativa nee nomos husu ba Tribunal Distrital Dili (TDD) atu halo providensia cautelar hodi suspende iniciativa destituisaun ida nee, no Presidente Parlamentu Nasional la considera atu halo deliberasaun ba pedidu destituisaun nee iha plenaria tuir Regimento Parlamentu Nasional Artigo 16 (b) haruka. Atus neebe Presidente Parlamentu Nasional halo nee reforsa tan teze atu dada tempu hodi kompleta deit atus dada tempu neebe VII Governu comete tiha ona durante nee, liga ba aprezentasaun programa governu nian ba dalarua.

Hare ba tempu neebe gasta barakliu ona ba formasaun governu minoria ida nee, atus neebe VII Governu nomos Presidente Parlamentu Nasional kontribui hatudu momos ma-fe atu enfrenta realidade politika neebe sira enfrenta, nunee atus hirak neebe sira komete mesmu ke viola tiha ona regras normais konstituisional no regimental sira, maibe kontinua obriga atu lao liu deit ou hakat liu deit regras nebe iha hanesan Estadu Direitu tuir artigu 1º no 2º Konstituisaun nian. At liutan komunikasaun politika neebe VII Governu halo no Presidente Parlamentu Nasional kontribui maka tendensiozu obriga sira nia hanoin no uza tempu barak atu hakbesik liuba possibilidade krizi instituisional hodi nunee fo kondisaun no referensia ba possibilidade Eleisaun Antesipada, teze ida neebe Bancadas AMP hare hanesan opsaun ikus liu kuandu laiha ona dalan seluk tuir CRDTL prevê ona.

Mosaun de sensura neebe Bankada AMP apresenta ba Presidente PN bazeia ba artigu 111º konstituisaun no regimentu PN nian artigu 140º, 141º no 142, tamba nee, AMP la halo golpe de estadu no asaltu puder hanesan Bankada Fretilin deklara ba publiku. Nee akuzasaun falsu no inaceitavel. Razaun hatama mosaun sensura ba VII governu tamba governu lakumpri regras konstituisaun artigu 108º loron 30 ba dalarua, tamba nee Bankada 3 aprezenta mosaun de sensura, laos atu halo asaltu puder ka halo golpe. AMP nia ezijensia mak atu agenda ba Plenaria hodi debate, deskute no aprova, se la aprova mak VII governu manten nia funsaun no se mosaun aprovado VII governu monu no fo fila ba Sua Ex-celensia PR atu foti desizaun tuir kompetensia neebe define ona iha konstituisaun, no obsaun saída deit mak PR foti AMP submete, respeita no kumpri se tuir konstituisaun RDTL nian.

Rekursu neebe AMP apresenta ba Plenaria ho relasaun ba PPL Orsamentu Retefikativu (OR) bazeiba artigu 99º Regimentu nian no tuir lolos tenki debate kedas iha loron nee, maibe Presidente Parlamentu mak anuncia dehan atu agenda fali ba lorn tuir mai (aban), maibe too agora AMP ezije nafatin atu agenda mas Presidente Parlamentu Nasional sempre buka razaun hodi dada no lakonsidera egigensia husi AMP tuir artigu 99ª regimentu Parlamentu Nasional nian nee.

Proposta husu destituisaun ba Presidente Parlamento Nasional tamba Prezidente Parlamentu Nasional la kumpri regas regimentais neebe vigora hanesan: artigu 99º, artigu 56º, artigu 9º no artigu 13º regimentu. Tamba nee Bankada AMP neebe kompostu husi KHUNTO, PLP no CNRT lakon konfiansa na Prezidente PN no husu atu halo distituisaun hodi halo nova eleisaun hodi hili Presidente Parlamentu Nasional atu nuee bele hadia gestaun no tuir regimentu no Konstituisaun. PPN Deputadu Aniceto Guterres eleitu tamba votus husi Bankada KHUNTO tamba razaun violasaun Regimentu mak KHUNTO mos deklara retira ninia votus de konfiansa tamba nee mak apresenta proposta nee.

Obrigado.

 

Dili: Partidu FRETILIN provoka hela situasaun hodi hamósu krize institusional  ne’ebé permite hodi halo disolusaun Parlamentu Nasionál no Elesisaun Antesipada. Sesta-feira, 8 Dezembru 2017 (Atu partilla imediatamente)

Iha loron 02 fulan dezembru tinan 2017 liu ba’, partidu FRETILIN fó sai ona komunikasaun imprensa ida, hodi

halao akuzasaun ba Opozisaun Parlamentár kona-bá responsabilidade hodi hahú krize institusionál.

Aliansa Maioria Parlamentár (AMP) rejeita akuzasaun mai hosi partidu FRETILIN ne’ebé hanesan asaun ida hodi halo propaganda atu lohi no halo konfuzaun ita nia opiniaun públika, katak mobiliza hela opiniaun públika hirak ne’e hodi kontra partidu Opozisaun, ho esperansa ida ne’ebé  mehi hodi hetan maioria absoluta iha eleisaun antesipada parlamentár ni’an ne’ebé ho nia kustu presipitadu liu.

Hare’e katak kontraria tebes ho buat ne’ebé partidu FRETILIN afirma ona no kontinua nafatin halo afirmasaun katak, VII Governu Konstitusionál ne’e la’os eleitu hosi ita nia povu maibé ne’e insensatamente no imprudente nomeadu hosi Sua Excelencia Senhor Presidente da República, nune’e’e maka limita ona atu informa (no sei la konsulta henesan ezize hosi K-RDTL) ba partidu politiku sira ne’ebé dadauk ne’e forma opozisaun Parlamentár.

Nescecidade hodi forma lalais VII Governu Konstitusionál ne’e, tanbá hare’e ba lójika ida, ne’ebé de faktu uza no aproveita hela afiliasaun partidária husi S.E señor Prezidente Repúblika iha partidu FRETILIN, hare’e katak fundamentalmente laiha impedimentu kona-bá inkapasidadi ne’ebé hatudu husi partidu ne’e hodi asegura apoiu maioritariu iha Parlamentu Nasionál ba Governu ida ne’ebé lidera hosi Partidu ne’e rasik, karik forma Aliansa Maioria Parlamentár ne’ebé diak hodi aprezenta ba Xefe Estadu alternativa Governu ida ne’ebé forte no diak hodi lidera ita nia Rai Doben to’o iha tinan 2022.

Ho forma ida ne’ebé lalais no atrapalladu maka karateriza husi prosesu formasaun ba VII Governu Konstitusionál ne’e, ne’ebé konstitui expresaun ida evidente katak Ezekutivu ida ne’e fraku tebes no demokratikamente ilejítimu, tanbá la hetan apoiu maioria husi ita nia Povu Doben, hare’e katak partidu Opozisaun maka aprezenta hela apoiu maioria iha  Parlamentu Nasionál, ne’ebé tuir hela regras konstitusionál hodi izerse hela responsabilidade ne’e ho forma ida ne’ebé séria nomós ho forma ida atu salva interese bo’ot ita nia kerida Pátria.

AMP no Bankada Parlamentár husi Opozisaun reafirma nafatin nia kompromisu hodi kontinua respeita no obedese ba ita nia Konstituisaun Repúblika, ne’ebé AMP halo hela to’o agora ne’e, no ita bele hare’e katak iha  hanoin ne’ebé absurdu (irasional ) kona-bá akuzasaun ne’ebé mai husi partidu FRETILIN, ne’ebé hatete katak AMP halao hela asaltu poder ka halao hela “ golpe Estadu”, liu husi aprezentasaun proposta rejeisaun ba Programa Governu ni’an no aprezentasaun musaun sensura ba Guvernu nomós aprezentasaun proposta hodi halo destituisaun ba Prezidente Parlamentu Nasionál.

Atentu katak iha responsável polítiku governamentais sira hatete katak iha ignoránsia ne’ebé grave kona-bá konseitu husi “GOLPE ESTADU”, maibé AMP esklarese ona katak “ GOLPE ESTADU” ne’e signifika hamonu Governu ida la tuir dalan ka ilegal, husi parte órgaun Estadu ida ba ordem konstitusionál lejítima. Nune’e’e, bele hare’e katak AMP halao kontrariu husi lia-fuan “golpe Estadu” ne’e, tanbá halo tuir hela meiu ne’ebé expressamente previstu iha Konstituisaun Repúblika no Rezimentu Parlamentu Nasionál ni’an, hodi asegura  katak forma Governu ida ne’ebé iha lejitimidadi demokrátika ba efeitu ida ne’e, ne’ebé tenki liu husi AMP.

Hanesan FRETILIN hatene, no lolos ne’e tenki iha seriedade hodi rekoñese publikamente artigu 109.o, n.o 2, husi Konstituisaun Repúblika, ne’ebé expressamente fó ba Bankada Parlamentár sira direitu hodi aprezenta proposta rejeisaun ba Programa Governu ni’an. Hanesan ita hotu hatene katak, iha loron 19 fulan outubru tinan 2017 liu ba’, Bankada Parlamentár hosi Opozisaun aprezenta ona proposta rejeisaun ba Programa Governu ni’an ne’ebé ikus mai hetan nia aprovasaun maioria absoluta husi Deputada no Deputadu sira.

Kontrariamente ho Sekretáriu-Jerál partidu FRETILIN ho sira nia Bankada Parlamentár afirma,  katak proposta rejeisaun ba Programa Governu ni’an ne’ebé AMP aprezenta ona no hetan ona aprovasaun, ida ne’e la rezulta husi ezersísiu maldade (a’at) ka vingansa ruma, maibé ne’e hanesan rekoñesimentu ida ba : Ezekutivu ne’ebé inkompetenti no la konsege aprezenta Programa ida ne’ebé respeita ba ezijénsia husi  artigo 108., nú. 1, Konstituisaun Repúblika; ba objetivu no prisipál orientasaun polítika, no sai hanesan deklarasaun irrealista ida, no hare’e katak atraza fali nesesidade ita nia Povu Doben; hare’e mós katak sei aumenta tan ka sei multiplika tan Zonas Especial Ekonomia Sosial Merkadu,  maibé to’o agora seidauk halo estudu prévia ida ba ZEESM/Oe-Cusse Ambeno, ne’ebé bele sai risku boot ba sustentabilidade finansas públikas iha ita nia Rai Doben nomós sei kompromete ba futuru jerasaun foun Timor-oan ni’an.

Sekretáriu-Jeral FRETILIN kontinua nafatin halao nia asaun propaganda atu defende ba Programa Governu ni’an ne’ebé inkompletu, inkonsistenti no irrealista, hodi afirma katak ida ne’e maka bele hadia Povu kiak sira nia moris. Maibé dokumentu ne’e hetan ona rejeisaun iha Parlamentu Nasionál no hare’e katak dokumentu ne’e halo hela komplikasaun boot kona-bá promessa hirak ne’ebé atu engana ita nia Povu Doben,  no hare’e katak em larga medida sei la realiza! Programa Governu ne’e kompremete mai ita nia finansas públikas atu halakon kiak maibé antes ne’e nia iha agravamentu no aumenta tan númeru kiak iha ita nia Rai Doben. Tanbá deit atu evita dezastre finanseira no sosial iha Timor-Leste maka Bankada Parlamentár husi Opozisaun rejeita tiha Programa Governu ni’an ne’e.

Partidu FRETILIN mós hatene katak aprezentasaun musaun sensura ba Governu ne’e expressamente hatur ona iha  artigu 111.o husi Konstituisaun Repúblika, ne’ebé iha fundamentu ka kestaun hirak ne’ebé bele relasiona ho ezekusaun Programa Governu ni’an nomós bele relasiona ho asuntu hirak ne’ebé relevante ba interese Nasionál.

Deputada no Deputadu sira ne’ebé aprova ona proposta musaun sensura ba VII Governu Konstitusionál ne’e, alemde halao hela sira nia direitu ne’ebé konstitusionálmente previstu ona no fó ba sira baze fundamentus  ha’at (4) ne’ebé relevante tebes ba interese Nasionál, hanesan tuir mai: primeiru, laiha lejitimidadi demokrátika hosi Governu, tanbá la hetan apoiu maioria husi Deputada no Deputadu sira iha Parlamentu Nasionál ne’ebé reprezenta maioria husi ita nia Povu Doben; Segundu, laiha kapasidadi no  inkompeténsia ne’ebé hatudu hosi Ezekutivu sira atu hatama Programa Governu ni’an ida ne’ebé kompletu no preparadu hodi hetan apresiasaun no labele hetan rejeisaun iha Parlamentu Nasionál, ne’ebé hatene katak dekore ka lao liu tiha ona fulan rua husi loron ne’ebé sira hetan tomada de posse; terseiru, ezekuta hela estretejia ida hodi hamósu konflitu institusional entre Governu ho Parlamentu Nasionál, ne’ebé hatudu liu hosi insultus ka koalia liafuan ladiak ba Deputada no Deputadu Opozisaun Parlamentár sira liu hosi Primeiru-Ministru no hosi Ministru Defeza no Seguransa; quartu, intensaun kona-bá notísia ne’ebé fó sai ona, katak Primeiru-Ministru la hatete dehan atu dada pipeline husi Greater Sunrise ba kosta norte Austrália ni’an.

Deputada no Deputadu sira ne’ebé assina musaun sensura ne’e, konsidera katak fundamentu hirak ne’ebé aprezenta ona ne’e importante tebes ba interese  Nasionál no tenki motiva ka husu demisaun husi VII Governu Konstitusionál, haktuir alínea f),  n.o 1,  artigu 112.o Konstituisaun Repúblika, ne’ebé hanesan ezersísiu normal ida no demoktrátika ba responsabilizasaun husi Ezekutivu ba Parlamentu,  iha konformidade ho prinsípiu separasaun no interdependénsia poder Estadu ni’an, expressamente previstu iha artigu 69.o husi Konstituisaun.

Apezar-de halo reklamasaun ba redasaun husi Konstituisaun Repúblika, partidu FRETILIN ho ni-nia Sekretáriu-Jerál parese ladun iha respeitu ho afirmasaun kona-bá hakerek iha ita nia Leí Inan ne’e ( Lei Fundamentál), maibé hare’e katak sira halai se’es ka subar fali hosi rezimentais hirak ne’e, atu nune’e’e bele evita VII Governu Konstitusionál halao buat ne’ebé kompete ba nia  no ba dignidade institusionál ne’ebé ezize tebes, katak aprezenta ba Parlamentu Nasionál hodi assumi sira nia responsabilidade kona-bá inkompeténsia no laiha responsabilidade ne’ebé hatudu iha ezersísiu asaun governativa ni’an.

Iha ezekusaun ba estratéjia atu evita Governu hodi kumpri sira nia dever konstitusionais liu-liu hodi responde no hodi responsabiliza ba reprezentante lejíitimu husi Povu Doben Timorense, hare’e katak Prezidente Parlamentu Nasionál subar hela asaun ilegal ka imorál ne’ebé komete husi ema seluk, tan ne’e maka, hare’e katak laiha kualker suporte legál ka rejimentál ida ne’ebé  halo hodi rekuza ajendamentu ba sesaun  plenária hodi halo diskusaun no votasaun ba musaun sensura, ida ne’ebé aprezenta ona iha semana rua liu bá , no hetan ona admisaun hosi Prezidente Parlamentu Nasionál.

Wainhira aprezenta proposta hodi halo destituisaun ba Prezidente Parlamentu Nasionál, Deputada no Deputadu sira ne’ebé asina iha proposta ne’e, halao hela kompeténsia hirak ne’ebé hatur ona iha artigo 16.o – B husi Rezimentu Parlamentu Nasionál ni’an, katak ida ne’e laos atu halo kualker alterasaun ka violasaun ba ordem jurídika ka konstitusionál iha ita nia Rai Doben, maibé buka hela dalan diak ida hodi rezolve difikuldade ne’ebé iha, no hodi halo avaliasaun  ba estabilidade iha relasaun konfiansa entre maioria husi Deputada no Deputadu sira iha Parlamentu Nasionál, ho nune’e’e maka Prezidente ba órgaun ida ne’e  sei laiha lejitimidadi polítika hodi halao ezersísiu ba nia funsaun karik akaba ona  ka hakotu  ona iha relasaun ne’e.

Iha nesesidade hodi hetan dalan ka meiu hodi rezolve difikuldadi rezimental hodi atraza ajendamentu mósaun sensura ne’ebé aprezenta ba VII Governu Konstitusionál, hare’e katak iha frakeza husi Ezekutivu ida ne’e, no falta korajem hodi koloka  ba nia laos deit planu polítiku-Parlamentár, maibé mós iha matéria dezenvolvimentu no defeza ba interese ita nia Povu Doben iha planu interNasionál.

Aliás, AMP konsidera katak FRETILIN empañada tebes ba sobrevivênsia Governu ni’an ba iha tempu badak, no sira iha espetativa ida katak atu kompleta deit prazu fulan neen (6),  atu nune’e’e  bele dissolve Parlamentu Nasionál no bele verifika liu hosi meius oi-oin katak iha duni krize institusionál, hodi nune’e’e Prezidente Repúblika  bele disolve Parlamentu no konvoka kedas eleisaun lejislativa  antesipada.

Kontrariamente ho buat ne’ebé afirma,  hare’e katak  FRETILIN laiha sentidu Estadu, ne’ebé ita bele hare’e sira kaer metin (agarrada) hela poder no sira uza hela meius oi-oin no dalan oi-oin, atu kontinua nafatin hodi tenta halao poder ida ne’ebé laiha kondisaun polítika ka laiha lejitimidade demokrátika. Karik pretende duni atu defende interese  Estadu ni’an, maka FRETILIN rasik tenki ezizi demisaun ba VII Governu Konstitusionál hodi nune’e bele loke siklu polítiku foun ida, ne’ebé diak hodi jere formasaun ba Governu ho apoiu maioria Parlamentár ne’ebé preparadu hodi viabiliza Programa Governu ni’an ho Orsamentu ida ne’ebé diak, atu dudu ita nia Rai Doben ba dalan dezenvolvimentu ni’an!

AMP ezizi katak, wainhira sei manten iha funsaun, maka Governu ida ne’e asegura nafatin iha respetivu kuadru kompeténsia ba protesaun interese públiku ni’an no laos ba interese eleitorais ni’an, katak uza osan hirak ne’ebé reserva hela  hodi hala’o  eleisaun antesipada iha tinan 2018 no halo pagamentu ba despeza ospitál hirak ne’ebé halo tratamentu ba sidadaun Timor-oan iha estranjeiru; nomós, hare’e katak Governu ida ne’e altera kedas orden suspensaun ba pagamentu despezas ne’ebé realiza ona ho projetu hirak ne’ebé finansia hosi Fundu Infraestrutura, atentu katak sei iha saldu hamutuk miliaun  US$110,715,522.79  hodi halo pagamentu ne’ebé rekere ona no valida ona hosi Ajénsia Dezenvolvimentu Nasionál (ADN).

AMP reafirma  nafatin ba Povu Doben tomak kona-bá kompromisu ne’ebé firme  hodi kontinua respeita no defende ita nia Konstituisaun no kontinua nafatin defende interese boot ita nia Nasaun, no iha faze ida ne’e passa  ba demisaun Governu ida ne’ebé sempre agarrada ka  kaer metin poder nomós rekuza atu rekoñese katak laiha kondisaun polítika nem iha lejitimidade demokrátika nesesária hodi bele Governa.

Ikus liu, AMP apela ba FRETILIN hodi hapara ona estratejia atu hamósu krize institusional ne’ebé permite dizolusaun ba Parlamentu Nasionál no eleisaun Parlamentár antesipada,  ne’ebé  serve deit hodi konfirma katak maioria sidadaun Timor-oan la fiar no la konfia iha nia programa polítiku.

 

 

Akompaña mídia sosiál, eletrónika no deklarasaun deputados apoiante VII Governu semana ne’e hatudu katak, mosu dadaun aktu organizadu - by design ne’ebé lori Aliansi Maioria Parlamentár (CNRT, PLP no KHUNTO) kadeira 35 iha sikun risku no amiasa nia laran hasoru nia povu rasik. Deklarasaun no informasaun ne’ebé espalla hatu’ur tiha Aliansi Maioria Parlamentár nu’udar forsa polítika ida ne’ebé hakarak mak hadau de’it ukun hosi Fretilin nia liman.

La’e, Aliansa mosu ho objetivu atu responde situasaun instabilidade Governasaun ni’an ne’ebé hahoris hosi Koligasaun Minoritáriu (Fretilin no PD) ho kadeira 30, koligasaun ne’e la-tuir ona rekezitus Konstituisaun ni’an. Tanba ho kadeira ne’ebé la-liu 50%+1 sei halo VII Governu frajil tebes hala’o governasaun ida ne’ebé mak tenke forte no estável. Aktu konstituisionál ne’ebé Aliansi hala’o dadaun nakfilak tiha sai kulpa ba CNRT, PLP no KHUNTO ni’an.

Triste tebes, ita hare’e no rona notísia iha televizaun radio no mídia sosiál kuaze opiniaun ema barak ninian atu “como se” mosu krize polítika tanba sé Governu monu, tenke eleisaun antisipada, Fretilin sei la entrega de’it, etc. Mobilizasaun opiniaun hosi Koligasaun Minoritáriu halo povu komesa pániku no tauk, em vez ema-hotu inklui politikus sira halo deklarasaun maiz konstruktivu ba povu kona-ba normas demokrasia ni’an, eh mosu deklarasaun oin-oin hodi halo povu tauk liután, no hetok liután soe kulpa hotu-hotu ba Aliansi Maioria Parlamentár.

Aktu organizadu hanesan ne’e labele husik buras! Situasaun hanesan ne’e labele husik, nu’udar forsa polítika iha rai doben ne’e, Aliansi Maioria Parlamentár (AMP) maske halo ona deklarasaun beibeik kona-ba pozisaun AMP ni’an hodi salvaguarda Konstituisaun RDTL no demokrasia, maibé presiza atu enkoraja povu, bolu atensaun ba líder, intelektual, igreja, sosiedade sívil no politikus sira-hotu atu kuidadu nia liafuan no atetudi iha públiku hodi fó hikas konfiansa moris hakmatek ba povu.

Ita-hotu tenke lori demokrasia ida ne’e ba iha nia-tasak!

Favór bót politikus sira tenke halo prevensaun no rezolve situasaun ide ne'e lalais!

 

#CNRT Media Center: 19 Otubru 2017

Dili, PN - Dr. Mari Alkatiri nia deklarasaun iha Parlamentu Nasionál katak Prezidente Partidu CNRT maka obriga nia hodi forma Governu, deklarasaun ne'e hanesan aktu fase liman husi ninia inkompeténsia harii koligasaun ida ne’ebé forte hodi garante estabilidade governativa.

Prezidente CNRT Kay Rala Xanana Gusmao konfirma katak, nia la permite e nunka permite formasaun governu ida ne’ebé minoria no la prienxe kritéria Konstituisaun RDTL nian ka fo apoiu ba formasaun governu minoria ne’ebé lidera husi Mari Alkatiri, sá tan obriga Dr. Mari Alkatiri atu avansa ho koligasaun ne’ebé iha de’it kadeira 30.

Dr. Mari Alkatiri nia deklarasaun iha Parlamentu Nasionál ne’e hanesan meius ikus liu ona ba nia atu defende an no fase liman ba ninia fallansu atu forma Governu ida ne’ebé estavel. Deklarasaun ida ne’e mós iha tendénsia atu soran povu ba deputadu opozisaun nian hodi uza Prezidente CNRT nia naran, tanba ne'e husu ba publiku atu mantein hakmatek.

 

#CNRT Media Center: 10 Outubru 2017

Díli, PN - Bankada CNRT liu husi deputada Carmelita Moniz Konsidera VII Governu Kontitusional kahur assuntu iha formasaun juridiku ne’ebe iha nia natureza rasik.

“Membru VII Governu foin halo nia knar iha loron 30 nia laran maibe iha ona ideias klara kona ba dez adekuasaun ba assaun formatiza husi sentru formasaun juridiku no judisiaria, ba ida ne’e hau admira uitoan ba ministru ka vise ministru ne’ebe tutela,” dehan deputada Carmelita iha Plenaria Parlamentar bainhira halo diskusaun ba programa VII Governu ba loron daruak, Tersa (17/10/2017).

Nia hatutan, iha VI Governu konstitusional nia mandatu koalia mos kona ba politika programa no aktividade ne’ebe adekuadu hodi konkretiza objetivu sertu. Tanba ne’e tuir nia iha dokumentu ne’ebe agora daudaun iha governu la esplika ho forma no objetivu ne’ebe klaru atu nune’e bele konkretiza ba oin ho diak. Maski governu kria mos kona ba tentativa atu export sentidu alterasaun ne’ebe propoin hodi mellora diak liu tan kualidade formativu iha sentru formasaun juridiku sira. Nune’e nia husu alterasaun saida mak governu halo atu introduz no hodi atinze nia objetivu ne’ebe diak iha futuru.

 “Liu husi Programa ida ne’e hau hare Governu kahur tiha ona asuntu rua ne’ebe mak ho nia natureza rasik, eskola de Direitu nudar sentru akademiku do investigasaun sientifika iha area juridika, Sentru formasaun juridika atu forma ema profisional sira tuir ida-idak nia vokasaun ka kapasidade intelekutual,” dehan Carmelita.

Nia hatutan bainhira governu kahur tiha sasan sira hanesan ne’e la tama iha nia lojika. Tanba ne’e nia husu ba Ministru ne’ebe tutela karik iha rajaun seluk bele halo esplikasaun sobre asuntu refere.

Hatan ba preokupasaun ne’e Primeiru Minstru Mari Alkatiri hatete, agora daudaun Timor – Leste prepara sentru formasaun ne’ebe barak atu lori Juridiku Timoroan sira ba vida profisional.

“Ita agora tenke lao ba oin, laos dehan ita labele, se labele entaun hapara hotu, hapara dezenvolvimentu ne’e, se proposta mak ida ne’e haruka mai halo favor ami simu para atu hapara dezenvolvimentu se ita hakarak atu halo dezenvolvimentu iha area hotu-hotu entaun ita tenke lao,” dehan PM Alkatiri.

Nia fo hanoin, Governu ne’ebe deit iha kontinuidade maibe tenke iha korazen para atu responde ba nesesidade atu nune’e, kontinuidade labele marka pasu iha fatin. “Los agora ita nia problema iha justisa mak ida ne’e juis ida nia mak deside ba buat hotu iha area justisa nian, entaun konplikadu tebes, se presija atu halo formasaun ba ita nia juis sira iha area ida-idak ita tenke halo atu nune’e bele hasae kualidade justisa ne’ebe diak iha ita nia rain, se lae ita iha fatin deit, halo dezenvolvimentu ba area ekonomia deit la halo dezenvolvimentu ba area justisa,” dehan Alkaktiri.

 

#Díli: 17 Otubru 2017

Díli - Konferensia imprensa nebe mak halao husi organizasaun massa Partidu CNRT, PLP no KHUNTO nebe hamahan an iha Aliansa Maioria Parlamentar (AMP) ba situasaun atual iha rai doben Timor Leste atu maluk juventude hotu tenki koalia lae ba violensia hodi kria estabilidade nasional iha território Timor laran tomak, nebe halao loron 16 Outubru 2017, iha hotel Novu Turizmu-Dili.

TANE O RAIN NO EMA HO HISIK KOSAR BEN RASIK HODI BÁLI POVU NIA MEHI

Kosidera katak, iha eleisaun ne'ebe realiza iha loron 22 fulan Jullu 2017, povu Timor Leste espresa ho forma livre no demokratiku nia vontade hodi la fo ba partidu polítiku sira hotu ne'ebe konkore iha aktu eleitoral ne'e hodi hetan maioria absoluta iha parlamentu Nasional. Rezultadu ida ne'e, hatudu katak atu forma governu ida ne'ebe metin (estavel) no reprezentativu, persiza servisu hamutuk entre partidu politiku sira ne'ebe iha asentu parlamentar atu nune'e bele hamosu aliansa maioria parlamentar ida ne'ebe garante estabilidade governativa.

Rekonese katak, servisu hamutuk ne'e, rekere esforsu no sakrifisiu boot hosi partidu politiku sira hodi konverje (tau Hamutuk) politika no programa ida-idak nian hodi nune'e bele integra iha planu komun ba governasaun ida ne'ebe fo impulsu ba dezenvolvimentu no moris diak povu nian. Hare'e ba situasaun atual, governu ida ne'ebe la ho apoiu maioria parlamentar sei hetan difikuldade hodi hamosu no implementa nia programa ho diak tanba laiha forsa politika, nue'e tau iha kauza dezenvolvimentu paiz ne'e nian. Konsidera katak, paz no estabilidade hanesan fatór determinante ba prosesu dezenvolvimentu paíz ida ne'e nian hodi nune'e bele lori moris diak ba povu tomak.

Hare'e ba situasaun ikus-ikus nian ne'ebé halo komunidade preokupa mak ami hosi organizasaun massa juventude hosi partidu libertasaun popular (PLP), Partidu Kmanek Haburas Unidade Nasional Timor oan (P.KHUNTO) no Partidu Congresso Nacional Reconstrução de Timor Leste (P.CNRT) ne'ebé hamahan aan iha aliansa maioria parlamentar (AMP) ho hakraik aan apela ka husu ba joven sira hotu iha Timor laran tomak hodi :

  • Tane aas nafatin unidade nasional no dehan lae ba kualker violensia ka konflitu ne'ebe ema ruma hakarak provoka hodi servi deit individu ka grupu nia interesse hodi estraga ita nia rain doben Timor Leste;
  • Tu'ur hakmatek akompaña prosesu politiku ne'ebé la'o hela iha ita nia rai liu-liu debate programa VII Governu nian iha Parlamentu Nasional tanba kualker desizaun ne'ebe foti iha parlamentu nasional ho objetivu ida deit maka hametin Estabilidade Nasional, hametin Unidade Nasional, respeita Konstituisaun RDTL hanesan ba Timor Leste no tane aas povu doben ida ne'e nia moris diak.

Nune'e mos ami Organizasaun Juventude Aliansa Maioria Parlamentar apela ba:

  • Instituisaun seguransa nasaun Timor Leste kumpri no leal deit ba Konstituisaun RDTL nian atu firme hodi kontinua asegura seguransa, paz no estabilidade atu nune'e povu ida ne'e kontinua moris iha hakmatek nia laran.
  • Nai ulun (Lider sira) politiku hotu-hotu atu respeita nafatin Konstituisaun ho lei sira ne'ebe vigora iha ita nia Konstituisaun no lei sira ne'ene vigora iha ita nia rai doben Timor Leste no tane aas nafatin interesse povu no estadu ida ne'e nian.
  • Juventude Aliansa Maioria Parlamentar nia atu vijilante, labele monu ba provokasaun sira ne'ebe ema sira halo, mantein nafatin seguransa iha fatin ne'ebe deit ita hela ba, koopera ka servisu hamutuk ho forsa seguransa nian (PNTL no F-FDTL) atu kontinua mantein oden publika, paz no estabilidade.
  • Hanesan mos juventude Timor Oan, ami rezeita totál kualker tentativa atu viola Konstituisaun RDTL ba interese no benefisiu pessoal, grupu no partidu. Tamba ne diak liu hamanas deit espiritu lealdade total ba Konstituisaun RDTL, hodi haburas rai doben RDTL, liu husi politika ne'ebé dignu, seguru no estavel ba Timor Leste nia futuru nebe diak no midar liutan.

Ikus liu, Ami Juventude Aliansa Maioria Parlamentar husu ba prezidente Repúblika atu tetu didiak situasaun polítika ne'ebe la'o iha rai laran atu nune'e foti desizaun ida ne'ebé ho justu no tuir regras konstitusionais.

Nune'e maka AMI LA KONKORDA ho hanoin sira ne'ebé dehan katak, se programa la aprova iha parlamentu nasional maka prezidente sei dekreta ELEISAUN ANTESIPADA. Tanba eleisaun antesipada sei la serbi interese povu no nasaun.

 

Tane o Rai, Tane o Emar no Tane o Lisan!!!

Hikis Kosar ba Moris Diak!!!

Mehi Hamutuk Mehi Povu nia Mehi no Fiar An Lao Ba Oin!!!

Viva Juventude Loriku Aswain Viva RDTL!!!

Viva Povu Maubere!!!

 

Asinadu husi Porta Voz:

  1. Presidente Juventude CNRT
  2. Presidente Juventude PLP
  3. Presidente Juventude KHUNTO

 

#Díli: 16 Otubru 2017

Page 1 of 18

About us

Depois Presidente Fretilin Nicolau Lobato mate iha 31 Dezembro 1978, Funda­dor Fretilin no membru Comite Central Freti­lin ne’ebe salva a’an iha rai liur “ la iha tan mehi ba ukun a’an”. Tamba husi 31 Dezem­bro 1978 to’o 1983, iha tinan 5 nia laran, Fundador Fretilin lahatene los se mak bele hatutan funu ne’e. Mari Alkatiri hanesan mos fundador Fretilin ida, ba Jurnalista Timor Post iha dia 04 Janeiro 2010 hateten katak “wainhira rona katak Nicolau Lobato mate, ami dehan agora saida mak atu akontese, ami komesa hare senariu bara-barak se mak atu troka Nicolau Lobato..

Contact us

Informasi seputar kegiatan Partido CNRT, silahkan hubungi salah satu kontak di bawah ini:

  • Address : Dili Timor Leste

  • Email : This email address is being protected from spambots. You need JavaScript enabled to view it.

  • Phone1 : +67078461438
    Phone2 : +67077846639