Iha publiku naran Julio Tomas Pinto alende konesidu nudar Sekretariu Estadu Assuntu Defeza, uluk mos konesidu hanesan ema independeti ida ne’ebe ativu iha observador politika no militar. Observasaun ne’ebe Julio Thomas Pinto halo nee mak halo Primeriu Ministru Kay Rala Xanana Gusmao iha nia governasaun deside bolu nia hodi asumi kargu ba Sekretariu Estadu Assuntu Defeza.

Dadauk nee, ho laran brani, Julio Tomas Pinto deside aan hodi husik titlu nudar ema independeti no involve direitamente iha partidu politiku nudar militante Partidu Congresso Nacional Recontrucao Timorense (CNRT). Maski kleur ona tama CNRT, offisialmente keanggotaan Julio Thomas Pinto foin mak rekonese iha 2011 ho numeru kartaun 5782/2011 hanesan militante CNRT husi Distritu Dili.

Atu hatene prosesu involvimentu Julio Thomas Pinto (JTP) iha partidu CNRT, tuir mai nia  intervista exclusivu kompletu Jornalista Jornal Nacional Semário (JNS), Gantry Meilana ho Francisco Belo Simoes.

JNS : Uluk Ita Bo’ot konesidu hanesan ema independent no observador politika, too governu bolu Ita Bo’ot tama membru governu. Mais agora Ita Bo’ot hili dalan seluk hodi involve direta iha atividade partidu politiku, tamba saida?

JTP : Hau hanoin iha TL nee ita atu buka ema independeti nee susar uituan, tamba ema hot-hotu tenki ba vota, ba partisipa elisaun. Tamba ne maka depois 2002 sae mai, hau hanesan observador, hau mos hare katak iha dalan barak para ita serve nasaun ida nee. Portantu dalan ida mak, involve iha bele universidade, Ngo, bele iha governu, bele iha partidu politiku. Klaru ita tenki halo selesaun ba partidu politiku sira ne’ebe iha. Ita hare iha planu, vizaun ba estadu nee halonusa, ba nasaun nee halonusa, ba futuru nasaun nee halonusa, depois ida nee halo refleksaun ida konjunta ho ema barak, iha partidu rua ou tolu nebe hau hare katak nia vizaun, planu, stratejiku nee hanesan  mos saida mak nasaun nee hakarak.

Tamba ne hau hare katak iha tempu ona ema hot-hotu bele ba partisipa iha partidu politiku, inklui hau. Iha ema barak dehan katak tama partidu politiku nee para atu hadau poder, nee los. Maibe, poder laos buat ida ke determinante para atu servi nasaun nee, estadu ida nee, povu ida nee. Tamba nee maka koko tok karik iha dalan rum abele servi liu husi partidu politiku, mais nee foin maak atu komesa nee, mais ita iha rai ida nee  kuandu tama partidu politiku nee hanesan fali inimigu. Mais ita tenki ona, kolega balun agora iha partidu seluk, kolega balun iha partidu CNRT, kolega balun iha Fretilin, kolega balun iha PD, PSD, ita tenki muda ona karakter ida, muda kultura politik ida katak kuandu tama partidu ita inimigu fali, nee ita tenki muda ona, tenki tau nafatin katak, tama partidu para depois halo kompetisaun iha planu, iha vizaun para depois povu mak determina partidu ne’ebe mak fiar ba oin.

JNS : Ohin Ita Bo’ot temi ona partidu lubuk ida, maibe tamba saida Ita Bo’ot hili fali Partidu CNRT ?

Partidu hot-hotu diak, partidu CNRT nee partidu ida kee ninian planu stratejiku mos diak teb-tebes, I liberdade ba ema hot-hotu para fo kontribuisaun, no foin mak komesa. Partidu sel-seluk nee, kleur ona, ema mos barak ona mak involve aan iha partidu nee, diak liu ita komesa husi ida foun nee. Ida ne para bele hare tok kontribuisaun ba rai ida nee ba oin.

 JNS : Ita Bo’ot hili CNRT, tamba figura Xanana?

JTP : Nee ida. Figura Maun Boot Kay Rala Xanana Gusmao ninian vizaun ba nasuan ida nee, nia istoria, ninia pensamentu ba povu, ida nee ida ke determina, ema barak mak tama partidu nee tamba ida nee. Tamba ne mak hau hanoin katak laos deit Maun Xanana, mos planu i oinsa ita kontribui ba setor neebe ke ita iha para dezemvolvimentu rai ida nee ba oin diak liu. Mais, hau fiar katak partidu seluk mos iha ninia planu diak ba nasaun ida nee. Agora fila fali ba povu, povu mak determina, povu mak kaer kartu AS para determina se mak kontinua.

JNS : Hau husu deskulpa ba pergunta nee, mais bele hateten Ita Bo’ot hili CNRT para mengamankan pozisaun ne’ebe ita iha ba governu foun tuir mai?

JTP : Laiha. Se mak mai iha Defeza nee, nee laiha problema. Tamba planu defeza nee preparadu tiha ona. Ema troka tun, troka sae, mais kuandu sistema lao tia ona nee bele kontinua. Ne’ebe laos tamba poder, tamba poder nee parte kiik ida husi kontribuisaun ba estadu ida nee.

JNS : Aban Partidu CNRT sei halao kongresu ba daruak, oinsa Ita Bo’ot nia hare ba kongresu nee?

JTP : Klaru ita tenki fo parabens ba lider CNRT iha period tina 4 liu ba, tamba sira sira husi obstaklu ne’ebe makas, sira dezafiu makas, depois sira kria koligasaun ho partidu sel-seluk too hamosu governu AMP, i hau fiar katak, CNRT ba oin, agora dadauk nee konsolidasaun diak teb-tebes, kongresista ohin aban mai dadauk ona, sira sei partisipa iha kongresu nee. Mais importante liu ba kongresista sira iha kongresu nee maka planu partidu nian. Planu partidu nian mak importante liu, para depois kuandu ema iha tiha ona atu tuur iha estrutura ne’ebe iha hela implementa deit planu sira nebe iha. Ema balun dehan katak estrutura nee importante, mais ba hau planu importante, duke estrutura. Depois estrutura maka halao planu ida nee. Ne’ebe focus iha kongresu, diak liu hare ba planu partidu nian ba oin, tinan lima nian mai, tinan sanulu nian mai para depois oinsa dezemvolvimentu lao ba oin.

JNS : Koalia kona ba estrutura partidu nian, hanesan ema hotu hatene ona katak 100 % Xanana Gusmao sei lidera nafatin CNRT nudar prezidenti partidu. Agora oinsa hare fali ba sekretariu jeral ne’ebe sai hanesan motor pengerak partidu nian, Ita Bo’ot nia hare figura sekretariu jeral oinsa mak CNRT presiza dadauk nee?

JTP : Prezidenti partidu hau hanoin kongresista mos sei hakarak nafatin ita nia Maun Boot Kay Rala Xanana Gusmao ba oin nafatin. Hau rona husi baze, kuandu hau lao ho sira, iha baze, nee dehan katak sira hakarak nafatin Maun Boot Kay Rala Xanana Gusmao sai prezidenti partidu, maibe nee depende ba kongresista sira, kongresu mak determina. Maibe posibilidade ita hare Maun Boot ba fali prezidenti partidu nee boot teb-tebes. Segundu kona ba estrutura sira mai kraik vise prezidenti sira nee kongresista sira mak deside sei mak bele ba tuur iha neba, importante mos sekretariu jeral. Sekretariu jeral nee ema barak mak temi ona naran senor Bendito, senor Rigoberto i ema barak tan mak mosu iha ne’eba. Portantu, kongresista sira mak sei deside. Maibe, ema neebe ke hetan konfiansa husi prezidenti partidu i bele servisu hamutuk ho prezidenti partidu, bele intepreta pensamentu prezidenti partidu, i bele hatene hanoin prezidenti partidu nian hanoin ba estadu ida nee, para bele implementa iha realidade politika nasaun ida nee ninian.

JNS : Iha naran kandidatu sekretariu jeral ne’ebe mosu, temi mos Ita Bo’ot nia naran. Oinsa Ita Bo’ot nia komentariu, Ita Bo’ot prontu kandidata aan?

JTP : Lae, lae. Hau la merese sai sekretariu jeral ida. Hau hanoin ema barak ohin hau temi naran hanesan Bendito, Rigoberto no ema barak tan, neesira iha kapasidade naton, kapasidade diak para lori partidu ba oin. Hau nee hanesan media mak hamosu deit hau nia naran. Mais, hau laiha hanoin ba sekretariu jeral.

JNS : Depois kongresu remata, no nia lideransa eleitu ona. Saida mak ita espera ba lideransa foun sira?

JTP : Dezafiu boot depois rezultadu kongresu maka elisoens 2012. Ita hotu hatene katak factor estabilidade ba rai ida nee importante teb-tebes. Partidu politiku hanesan CNRT, hanesan partidu ida neebe ke iha vizaun diak, nee tenki fo izemplu ba ita nia populasaun sira katak ita lakohi tan tama tan iha krizi hanesan akontese ona iha pasadu. Iha 2002, depois ita restaura ita nia ukun rasik aan, 2002 ita iha kedas violensia Dili, iha 4 Dezembru, kada tinan rua ita iha krizi. Depois 2004, ita iha tan problema iha Lospalos, entre forsa ho polisia iha neeba. Estadu tempu neeba halo investigasaun, nee violensia ida. 2004 sae ba 2006, ita iha krizi politik military, kada tinan rua, ita iha krizi. 2006 sae ba 2008 ita ih atan krizi atentadu ba ita nia xefi estadu no xefi governu. 2010 ita laiha krizi katak ita hakotu violensia nee iha 2008, ita komesa tama ona ba situasaun hakmatek para atu fokus ba dezemvolvimentu. Partidu politiku sira barak mos koalia ona katak factor estabilidade importante ba dezemvolvimentu nasional nian. Tamba nee maka ita hakotu ona iha 2008, nee ikus liu, 2010 ita liu ona laiha, 2012 partidu politiku hotu-hotu tenki tau iha nia konsiensia katak estabilidade importante. Tamba nee krizi tan labele iha, elisaun nee povu maka determina, se mak manan, se mak lakon nee normal iha politika, sei ita lakohi lakon, ita hakarak manan deit ita lalika tama iha politik. Tamba iha politika, manan-lakon nee normal, tamba nee maka iha 2012 ita espera katak eleisaun lao normal. No ba CNRT, kontribuisaun ba estabilidade importante teb-tebes tamba ida nee partidu nia programa duni i vizaun maun Boot Xanana Gusmao duni dehan katak iha 2011 nee tinan ba estabilidade para 2012 nee Vitoria ne’ebe bele hetan iha eleisaun nia laran. Neebe, hauhanon katak dezafiu boot ba estrutura foun CNRT nee mai konsolidasaun tenki hasae tan, depois para oinsa bele susesu, manan iha eleisaun tamba Maun Boot Kay Rala Xanana Gusmao nia vizaun dehan ona katak kuandu nia hetan deit 32 kadeiras nia sei ba parlamentu deit, nia lakohi ukun, husik partidu seluk ukun, depois kontrola husi parlamentu. Ne’ebe sei hakarak kontinuasaun governu partidu ida nian tenki servisu makas liu estrutura hot-hotu, para depois iha nasional too baze para depois susesu iha eleisaun 2012.

Source: Jurnal Nacional Semanario         

Last modified on Friday, 05 December 2014
  • 0 comment
  • Read 29570 times

Leave a comment



Anti-spam: complete the taskJoomla CAPTCHA

About us

Depois Presidente Fretilin Nicolau Lobato mate iha 31 Dezembro 1978, Funda­dor Fretilin no membru Comite Central Freti­lin ne’ebe salva a’an iha rai liur “ la iha tan mehi ba ukun a’an”. Tamba husi 31 Dezem­bro 1978 to’o 1983, iha tinan 5 nia laran, Fundador Fretilin lahatene los se mak bele hatutan funu ne’e. Mari Alkatiri hanesan mos fundador Fretilin ida, ba Jurnalista Timor Post iha dia 04 Janeiro 2010 hateten katak “wainhira rona katak Nicolau Lobato mate, ami dehan agora saida mak atu akontese, ami komesa hare senariu bara-barak se mak atu troka Nicolau Lobato..

Contact us

Informasi seputar kegiatan Partido CNRT, silahkan hubungi salah satu kontak di bawah ini:

  • Address : Dili Timor Leste

  • Email : This email address is being protected from spambots. You need JavaScript enabled to view it.

  • Phone1 : +67078461438
    Phone2 : +67077846639

OJP, KMP & KP