Dionísio Babo Soares

Secretário Geral Partido CNRT

Alokusaun iha okaziaun konferencia extraordinária Partidu CNRT, 2-3 Agosto 2014

Excelencias:

“Kompanheiro Presidente do Partido, Companheiros Vices-Presidentes, Membros do Conselho Diresaun Nasional do Partido, Companheiros membros orgauns autónomas do Partido (KP-OMP-OJP), Membros do Governo Indicados pelo Partido, Companheiros Cordenadores dos Distritos, Sub-Distritos, Nureps no distinctos konvidados, observadores, militantes ho simpatizantes no maluk Timor Oan tomak”:

 Introdusaun

  • Iha Abril 1997, ka tinan sanulu resin hitu liu ba iha Peniche Portugal, Timor Oan tomak nebe representa aspirasaun no afiliasaun politika oin-oin deside lao hamutuk iha sigla CNRT (Conselho Nacional da Resistencia Timorense) nia mahon hodi afirma kompromissu ba Unidade Nacional. Ho Hanoin no Neon ida deit, katak atu realiza ita nia ante-passados ho asswain sira nia mehi hosi tempo immemorial liu hosi Dom Boa Ventura, no ikus mai hatutan ba ema hanesan Komandante Nicolau Lobato, Kay Rala Xanana Gusmao ho sira seluk katak ita Timor oan tenki hamutuk.
  • Ohin, hau hakarak relembra fali prosessu istóriku ida ne, nebe hahu kedas bainhira lideransa funu komessa processo de restruturasaun no reajustamento ba organisasaun da resistensia nacional. Hahu kedas iha 1978 bainhira baze de apoio rahun, ita buka forma oinsa atu promove Unidade Nacional. Tuir relatório Chega! (Chap. 5, p.27-29), hafoin de retrocesso lobuk ida iha primeiros tempos da resistensia, lideransa sira hanoin harii Conselho Revolucionario da Resistensia Nacional (CRRN), nudar veículo atu halibur Timor Oan hotu, la hare partido ou afiliasaun polítika (p.28), nebe hakarak involve iha luta ba libertasaun Timor-Leste atu bele kolabora. “This is seen as a landmark change in the direction of the organised resistance (historic meeting of 1-8 March 1981).
  • Ho espírito hosi Lideransa altura nebá, ho actos nebe sira halo nomeadamente Reajustamento ho Restruturasaun ba organisasaun da resistensia ho estrategia atu sustenta funu iha tempos dificies atu responde ba ezigencias tempo neba nian, – ohin – ita nudar partido no nudar nasaun, hamutuk dala ida tan iha mahon Unidade Nacional hodi bele debate assunto principal nasaun nian nebe ita hasoru dadaun.
  • Transformasaun hosi forma resistensia konvensional ba guerrilla no formasaun de apoio iha frente klandestina ho frente diplomatika, iha tinan 1980 ba oin laos reflete deit resposta ba ezigensia da luta maibe reflete mos transformasaun natural nebe tenki mossu atu responde ba ezigensias funu nian. Iha ambitu ida ne, papel lideransa nian iha reorganizasaun no restruturaun ita nia forma de resistir hasoru potensia boot nebe invade hela ita, importante tebes.
  • Iha neba kedas mak ita preve katak luta nebé sei naruk (prolongada) no izige Timor oan sira nia kreatividade hodi oinsa hasoru desafius iha terreno no mós enkuadra aan iha atmosfera polítika global nebe, hahu lao.
  • Nune, maka ikus mai konsiensia, katak halao restruturasaun no ajustamento ita nia funu ba lalaok politika mundu nian preciza tebes atu sustenta ita nia funu; Ita ciente kedas katak laos konfrontasaun, laos atakes no assaltus militares, no laos táticas ho armamentos nucleares ho guerra konvensioinal maka ita bele konkista liberdade. Maibe previzaun ne hare katak ho maturidade, contemplasaun profunda iha pensamentos ho actos, plano ho estrategia, no ponderasaun nebe tasak konaba aksaun idak-idak iha terreno ho previsoens politika nebe klaru, ho matenek, no sinceridade atu hare probabilidade atu alkansa objektivu mak sei kaptura ita nia Vitoria. Dito e feito: ikus mai ho persistensia no resiliensia, iha 1999 ita konvense mundu no ita nia funu-maluk, no ho prego ita vota ba independensia.

Dala ida tan, iha ne papel no kreatividade ita nia lideransa Resistencia nacional desempenha papel imperative no inkortonavel.

  • História repete hikas iha momentos dificieis da luta, banhira komandante em chefe das Falintils no líder máximo da resistensia, Kay Rala Xanana Gusmão, ema kaptura, julga no kondenadu ho pena da morte liu hosi julgamentu teatrikal ida, ikus mai komuta unilateralmente ba tinan 20 iha prosessu judicial illegal, ita nia lideransa sira LA HALAI ho ansia atu kolu tiha título “líder máximo” da resistensia hosi komandante em chefe das Falintils ne.
  • Saida mak sira halo, meramente konjela tiha deit líder máximu nia poderes konstitusionais atu bele evita nia halo deklarasaun forsadamente iha presaun no ameasas nia okos, no hodi hein prosessu judicial illegal iha Tribunal artificial ne remata. Sira la ANSIA atu troka tiha lideransa máximo da resistensia ne’e tanba mezmo ke nia iha hela funu-maluk nia liman laran; sira hatene katak nia prezensa kontinua sai indespensável iha processo ka iha kontinuidade da luta ba ukun rasik aan. Ikus mai, nia rasik assume hikas fali pozisaun nudar lider máximu da resistensia mesmo ke iha prizaun laran.
  • Ikus mai, iha Peniche Portugal, iha Abril 1997 ita Timor oan sira rasik mak restaura hikas fali poderes nebe pertense ba lider máximu da resistensia hodi hahu lidera fila fali resistensia, mezmo hosi prizaun laran.
  • Aktu ida ne refleta buat balun nebe konferensia ida ne’e tenki pondera ho seriedade, tanba agora dadaun ita atu hola medidas atu deside kontinuidade lideransa governativa, no destinu estado. Pontos sira ne mak hanesan tuir mai ne:
  1. Iha tempo certos ita tenki hola medidas apropriadas atu responde ba situasaun nebe ezige transformasaun imediata no tenki bem ponderadas;
  2. Iha tempos hanesan ne ita tenki introduz medidas inovativas atu responde ba ezigensia tempo ne nian sem sakrifika interesse nasional;
  3. Por outro lado, Hametin liu tan Unidade Nacional;
  4. Katak iha momento dificil, banhira situasaun ezige, ita tenki halibur kondisoens hotu atu defende interesse estadu ho soberania nasional, no labele hamout interesse ida ne iha interesses partidarias ka interesses pessoais;
  5. Transformasaun ne tenki tane aas interesse nasional, no Fiar nebe tau iha lideransa actual nebe iha personalidade politika nudar mahon ba processo ne tomak no ezige ponderasaun nebe klean, analize nebe iha konteúdu bem substansiadu no ho neon nebe luan;
  6. Katak iha tempo sira nune, ba establidade, interesse ho unidade nasional ne, ita labele naran foti decizaun nebe precipitadu, nebe bele sakrifika fali ita nia objectivu principal nasaun nain, nebe tuir lolos atu fo biban ba Timor Oan tomak atu bele moris diak.
  • Ho mahon iha artigo 20 no artigo 37 (1) Estatuto Partido, nebe hatete katak, “konferencia nacional sei halao entre kongreso rua no Konferencia nacional mak si decide partido nia klalaok konaba assuntos nebe pertinentes ba interesse nacional” hau hakarak konvida ita hotu atu sadere didiak ita nia aan iha valores fundamentais sira ne nia mahon, hodi hare estado ho nasaun ida nebe ida hotu hadomi no tane. Ida ne importante tebes, tanba ita labele hosik assunto partido ho nasaun nebe ezige decizaun kolektiva ba ema ida rua nia liman deit.
  • Ita kaer besik deit ezemplo ita nia paízes irmauns balun nia experiencia nudar reflesaun. Mocambike ho Angola hafoin ukun aan iha 1975, partido hosi resistensia sira iha poder mak funu malun no lori nasaun rua ne ba iha guerra sivil kuaze 20 anos. Mezmo ke ikus mai sira bele normaliza fali ordens konstitusionais, ema rihun ba rihun mak mate tanba falta de konsiderasaun ba interesse nasional hodi asegura independensia ne rasik. Ita nia maun alin sira iha Guinea Bissau bainhira sira nia maun boot Amilcar Cabral hosik tiha mundu, hamossu golpes de estadu oin-oin, no poder politiku monu ba armadilha cartel drogas no comercio illegal, hases tiha Consituicao ho estado de Direito, no halo povo terus durante tinan hat-nulu (40) nia laran.
  • Ita Timor Oan rasik liu hosi esforso lideransa Timor Oan nomeadamente Xanana Gusmao, akompanhado hosi Dr Mari Alkatiri ho sira seluk mak ajuda rekopera fali ordem konstitusional iha paíz ne, no ohin sira bele moris dame.
  • Dala ida tan, ita nia lideransa hatudu ba ita aan rasik no ba mundo katak paciencia, determinasaun, persistensia, fiar aan no fiar iha ema hotu nia kontribuisaun MAK ITA BELE LAO BA OIN. Kestaun de lideransa, tanba ida ne, okupa papel central iha processo ne tomak. Se ita halo los, ita lao ba oin, maibe se ita la halo la-los, hamutuk mos ita labele halo buat ida.
  • Kestaun de lideransa da nasaun, do estado e do povo mak sai ponto central iha discurso ida ne. Nune, Ita mos labele haluhan katak elemento importante ida iha dezenvolivmento ekonomia mundial simbolizado hosi kresimento ekonomia paízes konsideradu nudar Novos Tígres iha Asia iha meados de 1980 mai oin, no dezenvolvimento paízes BRICS (Brasil, Rusia, India, China and South Africa) iha ikus ikus ne, para além de faktores atenuantes seluk mak kondiciona sira nia sucesso, la halai dok hosi kestaun central, iha Lideransa nebe matenek, forte no kredivel.
  • Timor-Leste nia fator essensial durante tinan hat-nulu ikus ne mos, ita tenki rekonhese, lao ho diak tanba iha lideransa nasional nebe diak, matenek atu gere, atentu atu preve estrategias anticipadas, no forte iha konviksaun no determinasaun atu tau interesse povo ho nasaun aas liu buat hotu.
  • Ba ita Timor-Leste, iha factores tolu mak sublinha iha nia lideransa nia lalaok hosi restaurasaun ba independencia iha 2002 to ohin loron: ita iha (1) Lideransa ida nebe sólida no forte; (2) Lideransa ida nebe tane as princípios “estado de direito”; (3) Lideransa ida nebe iha vontade polítika atu introduz Reforma iha biban Politika, Social, Ekonomica no ciênte ba mudansas politika nacional, regional no mundial.

Lideransa nebe Sólidu no Forte

  • Laos segredu ba ita Timor Oan tomak katak se laiha lideransa ida forte, ita nia processo ba ukun aan sei la hetan fatin.
  • Nune mos iha tempo ukun aan. Maske krize oin oin mossu, governo bele troka maibe estadu ida ne permanence. Nune konfiansa ba lideransa mos permanence. Baihira maun Xanana promote atu dada-aan hosi President da Republica iha 2006, antes de Conselho de Estado reune tanba situasaun krize altura nebá, povo lobuk ida ba blokeia Palacio das Cinzas atu resiste nia intensaun ne.
  • Hateke ba historia ita bele sura pontos kritikus iha ita nia vida nasaun nian. Iha 1999, ita nia funu-maluk mak kria krize politika hodi justifika aktus barbáricos nebe karakteriza processu referendu, no iha krize 2004 nebe ita Timor oan sira mak hamanas no hamosu konflitu, no culmina iha 2006 ho 2007 ho krize politika -militar nebe besik rompe tiha esforso sagradu tomak independensia nian, nebe besik hamonu ita ba estado falhadu. Ita nia rain atu fila fali ba Guerra Civil iha 1975, no besik atu repete fali esperiencia paizes irmaun balun iha CPLP.
  • Ho apoio internasional dala ida tan, ita ultrapassa krize polítika militar ne ho diak. Iha tinan 2012, forsa Internasional ho Nasoens Unidas hosik hela Timor-Leste, no mesak mesak, iha lideransa governasaun bloku koligasaun ho componentes hotu estado nain ho sosiedade sivil, ita rasik mak hadia hikas fali ita nia ekonomia. Dados estatísticos nebe foin fo sai, hatudu iha Crescimento Real (Non-Oil GDP) regista receitas nebe sae makaas iha 2012 kompara ho tinan 2011. Por ezmplo presu constant sae 7,8%, expensas consume nian ba uma kain ida-idak sae to 13,1%, liu liu iha seitor agricultura.
  • Tuir diresaun estatístika nasional, seitores industrias hanesan informasaun no komunikasaun, sae 19,6%, Agricultura, Floresta ho Pescas sae 14,5%, Aktividade Real State sae 14,4%, Administrasaun Públika sae 11.0%, no minarias ho quarrying sae 7,9% no wholesale ho Retail Trade sae 7.3%. Total GDP nacional tuir presu merkadu iha 2012 nebe hamutuk $5.579 milhoens consititui hosi 77,2% hosi sector Petrolífero no 22.8% hosi seitor Non Oil iha total GDP, nebe signifika aumento hosi crescimento entre 2011 ho 2012.
  • Kresimento ida ne, mesmo ke sae, seidauk refleta redusaun significativa hosi sector petrolífero nia kontribuisaun ba orcamento annual de estado. Tanba ne, ita nia esforso seidauk to rohan, seidauk responde ba planos no metas nebe ita esforsa hela dadaun. Ita tenki esforso nafatin atu hasae nafatin ita nia receitas hosi seitor Não Petrolífero nian.
  • Governo ida ne ho nia lideransa estabelece tiha ona planos atu dezenvolve seitor ekonomia, iha pakote dezenvolvimento integrado ida naran Plano Estratégico de Dezenvolvimento (PED), nebe ita sei koalia liu tan iha oin mai;
  • Maske hasoru situasaun nebe seidauk diak, iha kedas tinan 2008 mai oin, ita komesa hari fundo especial hodi hare ita nia veteranus, sira nebe fo vida no isin ba nasaun ida ne, no hare Inan-faluk sira nia laen ho oan kiak sira nia aman, nebe fo isin ba rai ida ne.
  • Ita mos harii kedas fundo de rekoperasaun ba vitima iha krize 2006-2007. Fundo ida ne halao durante tinan hat nia laran hodi responde ba necessiadade vitimas nebe afetadu hosi krize politika militar. Ema estrangeiro barak ho sira nebe la fiar aan no la fiar ita ho ita nia lideransa nia kapasidade hatete sínikamente katak paz ne temporário tanba “sosa ho ossan”. Sira haluha tiha katak ita ajuda ita nia ema tanba susar, mais laos lori ossan mak sosa ita nia determinasaun ba paz. Sobretudo, paz ne buat nebe ita buka hela durante 500 anos de colonizasaun, no ita sosa ho ruin ho ran. Tanba sa mak ita tenki sosa tan paz ho ossan?
  • Mesmo nune, ita tenki konfessa katak ema barak ladauk satisfeito, no la sente justo tanba exercicio diak nebe governo halo iha lideransa Kay Rala Xanana Gusmao. Ita mos tenki kumprende katak insatisfasaun sira ne mossu tanba sínikus sira uza salah patamar hanesan nasaun sira iha Amerika, Europa ka Singapura hodi sukat ita nia dezenvolvimento. Haluhan tiha katak ita foin mak restaura independensia tinan 10. Tanba ne, atu satisfaz ema sira ne nia desejo, ita preciza servisu liu tan atu dezenvolve ita nia rain, mais hadia mos sira nia kakutak hodi hanoin. Tanba ne mak ita nia esforso seidauk to rohan, no tenki kompleta.

Tuba Metin ba Estado de Direito

  • Ita hotu mesak Timor oan deit, no nudar familia ida deit, la interesse se ita partido ketak ketak. Ita moris iha nasaun ida nebe fiar katak diferensas ideias, religião ka rasa la hanesan, maibe hotu-hotu mesak Maromak nia oan deit; tanba ne ita partilha vizaun hanesan humanu no hanesan sidadaun nasaun ne nian.
  • Hau hakarak bolu ita-boot sira ba hare Inan-faluk ida nia esperiensia nudar sasukat ba povo ida ne nia determinasaun. Inan Faluk ne laen mate tiha iha funu laran no nia mesak tenki sustenta nia oan nain hat nebe sei kiik. Tinan bain-loron nia fan modo iha merkado, ho kalma, paciencia, rekolha osan hosi céntimos ba céntimos, tur hakdasak iha rai hodi koalia ho mamar ho hamanasa hodi bele hetan ossan, no fohan nia oan sira no selu sira nia eskola. Ho paciensia nia kumpre regras negocio nian no nunka viola regras nebe iha ka hamatak ema. Ikus mai nia oan sira licenciadu hotu iha kursu idak-idak nian hosi univestidade.
  • Lisaun ida nee refleta resiliensia inan-faluk barak iha ita nia rain, no mos refeleta resiliensia ho determinasaun ita nia povo. Refleta mos katak preciza estabilidade iha servisu loron loron, moris hakmatek no reziste pressaun oin-oin atu bele moris diak. Sobretudo, ida ne reflete lema funu nian: “Resistir é Vencer”.
  • Lideransa polítika nian, liu hosi Kay Rala Xanana Gusmao nia determinasaun refleta mos iha persistensia Inan-faluk nebe temi iha leten. Mesmo iha situasaun dificil nia sempre buka meio atu sobrevive, maibe tuir nafatin dalan no regras nebe los, dala ruma tenki observa leis ho parámetros nebe haklot espasu atu hola decizaun politika, hodi bele alkansa objektivu final. Los duni, ita tenki hakaas an hanesan inan-faluk sira maibe ho determinisaun no tuir regras no dalan nebe legal hodi alkansa ita nia objectivu.
  • Ita iha konstituisaun ida nebe garante direitos, deveres no liberdades nebe avansadu liu iha mundo. Ita sorte tanba hetan Independencia iha século Vinte e Um (XXI), hodi bele hare erros nebe iha ona, no aprende atu labele komete erros sira ne. Ita nia nasaun sai independente iha era globalisasaun moderna nebe direitos humanus tama iha agenda principal diskussaun internasional, nebe nasaun balun hanesan Estados Unidos da America (EUA) lori tinan atus rua (200) mak foin bele alkansa. Ita moris iha século nebe discriminasaun rasial proibidu ona, iha século nebe direitos humanos protegido tebes.
  • Maibe ita mos labele nega katak, liberdade nebe ezageradu no laiha limites dala ruma kontra rasik valores morais no religiosos nebe sai ona abut kultura ba ita nia povo. Liberdade ba ita laos atu permite incesto, violencia domestica no laos atu komite krime tanba deit ita iha poder.
  • Liberdade tem que iha abut metin iha Estado de Direito, principio nebe konsagra iha ita nia konstituisaun hodi garante objectivu estadu nian nebe hakerek iha artigo 6 C-RDTL katak Estadu nia objetivu fundamentál sira maka ne’e:

a) Defende no garante nasaun nia soberania;

b) Garante no promove sidadaun sira-nia direitu no liberdade fundamentál, no respeitu ba

Estadu nia prinsípiu kona-ba direitu demokrátiku;

c) Defende no garante demokrasia polítika no partisipasaun populasaun nian kona-ba rezolusaun problema nasionál sira;

d) Garante dezenvolvimentu ba ekonomia, ba progresu siénsia no téknika;

e) Harii sosiedade ida-ne’ebé hatuur iha justisa sosiál, hodi hakiak sidadaun sira-nia moris di’ak ba isin no ba klamar;

f) Proteje didi’ak meiu-ambiente no boli nafatin riku-soin rai nian;

g) Hakatak no haloko povu timoroan nia personalidade no nia liman-rohan kulturál.

h) Harii no haburas relasaun di’ak no harosan (kooperasaun) ho povu no ho estadu hotu-hotu;

i) Promove dezenvolvimentu ida-ne’ebé nakait kabeer ba setór oioin no rejiaun sira, no mós fahe loloos produtu nasionál nian;

j) Hamoris, promove no garante biban no leet ne’ebé hanesan ba ema feto no mane.

  • Maibe será que ita bele atinji ona objectivo hirak ne? Klaru ke ita seidauk konsegue halo buat sira ne hotu tanba ida ne ida labele precipita aan atu halo mudansas inesperaveis nebe bele kompromete objektivu nasaun no povo nia interesse.
  • Ita tenki dada hikas resiliensia, lideransa ho determinasaun inan-faluk nebe temi iha leten hodi refleta bainhira halo decizoes.
  • Nasaun ne iha ona instituisaun democraticas nebe estabelecido, no kumpre regras konstitusionais hanesan iha nasaun democraticas modernas. Ita nia hirarkia do estado mos hari metin ona maibe sei preciza hametin liu tan.
  • Estado ida ne respeita tebes separasaun de poderes orgauns de soberanias nian no konsente katak check and balances preciza eziste duni atu evita abuzo de poder, hases sobre-pozisoens de funsoens, no fiskaliza didiak insitutisaun idak-dak nia servisu. Check and balances preciza nudar principio hodi garante separasaun de poderes entre orgauns Legislativo, Executivo no Judicativo bele mantem ordém konstitucional no demcr’atica iha nasaun ne.
  • Parlamento nebe produktivu atu halo leis, no produktivu atu kontrola lalaok estadu iha área financeira mak hatudu nia funsaun lolos. Parlamento nebe bele kontrola servisu governo nian ho referensia nebe substansiadu no justifikadu mak bele garante governasaun tuir normas Constitucionais nebe iha.
  • Governo ida nebe diak mak bele implementa lei no exekuta planos de assaun annual hodi presta servisu ba povo nebe fo konfiansa ba governantes sira.
  • Tribunal nebe diak, katak Tribunal nebe bele aplika leis ho diak; Tribunal nebe diak mak garante justica nebe justo maibe mós hosi influencia grupos politicos ka la representa politicos sira nia interesse. Tribunais ho Ministerio Publico nebe diak maka sira nebe uza deit instrument legal iha sira nia atuasaun no evita uza precepsaun atu justifika lógika sira nia decisaun, bainhira julga kazus. Ida ne atu evita percepsaun nebe negativu hosi público, no hametin kredensia institusaun Judiciaria nian perante público.
  • Tinan hitu ne nia laran, CNRT hatudo ona, liu hosi nia lideransa, no iha assaun governativa, katak lideransa governo nian nunka interven iha decisoens Tribunais nian, maibe respeita nafatin idak idak nia knar tuir konstitusaun haruka.
  • Atu resolve disputes nebe involve instituisoens públicas do estado ho sidadaun, estado rasik harii Provedoria da Justica e Direitos Humanos hodi presta servisu iha area ida ne.
  • Estado mos la taka matan ba partisipasaun sociedade sivil iha area justisa hodi halo kontrolo nebe substansiado no justificado tuir regras democráticas nebe iha. Paricipasaun sociedade sivil nian labele ignora tanba sira mak sai nudar pressure group nebe aktivu iha parlamento nia didin-sorin atu hare lalaok governasaun nian.
  • Maibe servisu sira ne sei preciza atu hadia no hametin liu tan. Tanba ne ita preciza aproxima neneik atu hadia no laos liu fali hosi medídas radicais nebe bele kompromete nasaun nia interesse no instabilidade nasional.

Reformas nebe konsistente atu hametin estado

  • Ita kontextu ida ne, maturidade lideransa ho inisiativa atu hola medidas necessarias hodi responde ho prontidaun ba situasaun mak sai fator xave ba processu tomak. Se laiha lideransa ida nebe laiha konviksaun forte hodi kontinua prosessu naruk ne; se laiha lideransa ida nebe mak la kumpriende nia povo nia hakarak no povo nia necessidade, parese ita ohin la tur hamutuk atu koalia iha forum ida ne ho forma demokrátika. Se los mak tama iha kategoria iha linha de lideransa ida ne? Konferencia ida ne mak sei responde.
  • Ita mos labele nega katak konfigurasaun politika hosi 2007 mai oin, muda hosi klima ida kuaze konfrontativu tebes no konklui iha 2012. Hasoru atmosfera politika konfrontativu nebe iha altura neba, ezige laos deit maturidade hosi lideransa CNRT ho aliadu sira iha parlamento nacional, maibe ezige mos aksaun konsertada iha lideransa nebe forte nia mahon, nebe bele hakuak ema hotu, akomodativu no pasiente, hatene povo nia necessidade, hakbesik no tane aas povo nia interesse, no bele responde ba povo nia halerik.
  • Tanba ne mak CNRT nudar partidu, hau bele dehan orgulho, maski hasoru laloran polítika nebé boot, ita bele hakur liu ho sucesso. Iha neba mak ita bele ezamina ita nia pasiensia, dignidade, kumpriensaun, determinasaun ho maturidade politika iha lideransa nasaun ne nian.
  • Lideransa ida ne hili atu akolha ho kalma, ho formas demokrátikas processo governasaun tomak ho diak, hodi hatur sentidu de estadu ba Timor oan tomak nia kakutak, no garante estabilidade iha territorio tomak, no neneik maibe bebeik, buka atu responde necessidade povu nian atu bele FIAR AAN LIU TAN. Lideransa iha ne mak se los no iha se nia komando? Konferensia ida ne mak sei fo resposta.
  • Ita mos labele haluha katak iha tinan 2007, lideransa Timor oan sira halo decizaun nebe importante tebes atu resusita fali CNRT ho forma nebe kondiz ho situasaun neba, atu salva guarda estabilidade, soberania no integridade nasional. Liu mos hosi lideransa CNRT nian nebe eleitu iha konferensia iha altura neba ita fo apoio inkondisional ba eleisones presidenciais ba kandidatu ida nebe ikus mai sai Presidente da República mesmo ke ikus mai ita tenki hasoru difikuldades oin-oin nebe rompe tiha kredibilidade polítika nebe ita investe.
  • Povo vota ita nudar partidu Segundo mais votadu, tanba deit fiar ba lideransa partidu nebe mos kompartilha legitimidade istórika ho kredensia polítika indispensavel iha processo ukun rasik aan. Ita hamossu Precedensia foun iha istoria da governasaun nasaun ne nian; CNRT prezide koligasaun ho partidos lima (5) iha 2007 mai to 2012.
  • Se ida ne mak ita intepreta hanesan susessu, ita mos labele nega katak koligasaun istóriku ida ne representa dezafius barak, liu-liu oinsa atu prevene kriasaun de precendencias konvensionais nebe negativu iha governasaun ita nia rain nain.
  • CNRT kompromete atu submete ba interesse nasional desde início, hakuak unidade nasional no prepara sociedade ida nebe ciente ho situasaun atu asegura processo konstrusaun do estado. Processo konstrusaun do estado ne rasik tula metin iha processo  konstrusaun da nasaun nia laran; fo hela naha todan ida ba ita atu buka meio saida deit, atu garante estabilidade governativa to 2012. Ikus mai maske ho desafiu oin-oin, ita konsegue alkansa no hametin estabilidade governativa to 2012, laos tanba ita fiar iha ita nian aan deit, maibe tanba ita tau interesse povoho nasaun nian aas liu interesse hotu hotu.
  • Ho lideransa nebe forte, no tanba ita nia convicsaun nebe diak, mak iha 2012 CNRT eleito nudar partido mais votado.
  • Maibe iha governo, kestaun principal laos hare deit ba kapasidade atu mantém kolegialidade, maibe importante liu mak garante estabilidade governativa. Atu garante governu ida sólidu iha espírito kolegialidade nebe forte, além de izige paciência, kumpriensaun no honéstidade hosi membro idak-idak, ezige mos maturidade polítika no neon nebe luan hosi lideransa ne rasik.
  • Iha lideransa governo AMP nian, PM Kay Rala Xanana Gusmão ho nia ekipa alkansa tiha projecto boot hodi prepara planos ho metas nebe klaru sobre Timor Leste nia objectivu entre tinan 2010-2030, atu sai nudar paíz ho rendimento médio-alto iha 2030.
  • Metas ho planos sira ne kontempla iha dokumento nebe sai nudar mata-dalan ba dezenvolvimento nasional. Plano ne bazeia ba visão Povo Timor nian tomak nebe incorpora mos hanoin nebe mosu iha documento ´Timor-Leste - Uma Visão ba 2020´, nebe forma baze Plano de Desenvolvimento Nacional 2002 nian. Reflecte igualmente iha ne, Timor oan rihun ba rihun nia ponto de vista nebe contribui liu hosi consulta nacional no Plano Estratégico de Desenvolvimento nebe resumido; Do Conflito à Prosperidade, Adeus Conflito Bem Vindo Dezenvolvimento, iha 2010. Iha PED ita prevê:

CAPÍTULO 1 INTRODUÇÂO (VISÃO GERAL, CENÁRIO, PILARES DE INVESTIMENTO)

CAPÍTULO 2 CAPITAL SOCIAL (EDUCAÇÃO E FORMAÇÃO, SAÚDE, INCLUSÃO SOCIAL, AMBIENTE, CULTURA E PATRIMÓNIO)

CAPÍTULO 3 DESENVOLVIMENTO DE INFRA-ESTRUTURAS (ESTRADAS E PONTES, ÁGUA E SANEAMENTO, ELECTRICIDADE, PORTOS MARÍTIMOS, AEROPORTO, TELECOMUNICAÇÕES)

CAPÍTULO 4 DESENVOLVIMENTO ECONÓMICO (DESENVOLVIMENTO RURAL, AGRICULTURA, PETRÓLEO, TURISMO, SECTOR, PRIVADO)

CAPÍTULO 5 QUADRO INSTITUCIONAL (SEGURANÇA, DEFESA, NEGÓCIOS ESTRANGEIROS, JUSTIÇA, GESTÃO E BOA GOVERNAÇÃO DO SECTOR PÚBLICO, AGÊNCIA NACIONAL DE DESENVOLVIMENTO)

CAPÍTULO 6 CONTEXTO ECONÓMICO E DIRECÇÃO MACROECONÓMICA

CAPÍTULO 7 ESTRATÉGIAS E ACÇÕES CHAVE

  • Ho metas nebe klaru nune, iha kedas 2010, iha lideransa Kay Rala Xanana Gusmão nian, ita hahu reforma institusional ho harii instituisoens seluk-seluk tan hodi kompleta orgauns demokráticos nebe adiministrasaun transitória UNTAET ho Primeiro Governo harii hela. Ita harii Comissaun Anti-Corrupcao (CAC) hodi kombate korrupsaun, harii Comissaun Funsaun Públika hodi haketak funcionalismo público hosi polítika prátika, halo adaptasaun ba leis nebe kria hela maibe la refleta transparencia ho acountabilidade estado nian, hamossu lei foun no institusoens financeiras seluk hanesan Banco Central ho Micro Credit hodi komessa fasilita aktividade ekonomia rai laran.
  • Ita mos estabelece no hametin liu tan sistema de gestaun ba fundo petrolífero nebe rekonhecido aas tebes iha mundo. Ita sai paíz ho modelu de gestaun no transparensia diak liu iha gestaun fundo petrolífero iha Asia, no número trez iha Mundo. Ita bele orgulho tanba maski ita nasaun foun, no foin hamriik tinan 10, maibe nasaun lobuk ida mak agora dadaun mai aprende hosi ita nia sucesso konaba oinsa gere ita nia fundu petrolífero. Iha ambitu CPLP rasik ita mos hanoin hodi lansa konsorsiu petrolífero iha ambitu organizasaun ne nian.
  • Nune ita tama ba ambitu post-eleitoral 2012 ho sucesso. Ita hetan konfiansa boot dala ida tan hosi povo. Reforma fenomenal nebe ita introduz mak iha gestaun financeira nebe naran Sistema Free Balance; Sistema informatizado ba gestaun financas moderno nebe nasaun barak iha mundo nebe ukun aan tinan limanulu (50) ona mos seidauk adapta.
  • Klaru ke reforma institutional deit la too, maibe halo no hatudo ona oinsa atu bele lao. Ita sei preciza kapacita ita nia rekursus humanus, eleva ita nia konhecimento atu bele muda mentalidade hodi operasionaliza sistema moderno sira ne. Governo la taka matan, no reformas halao nafatin hodi hatudu katak ita mos bele.
  • Iha nasaun moderno, sai paíz soberanu deit ladauk suficiente. Se ita muda ita nia pensamento no preparado atu moris nudar sidaudun iha paíz soberano, ita preciza iha sentido de estado, tane interesse estadu aas liu interesse sira seluk. Infelizmente, ita seidauk konsegue atinji objective ida ne. Tanba ne, ita nai missaun, ho ita nia lideransa nia missaun seidauk remata.
  • Tanba ne, ita nia maluk sira barak rasik duvida ho ita nia sucessos no buka hatudu deit ba ita nia falhansu, maibe barak ka witoan ita halo ona, no Timor Leste simu bebeik ona rekonhecimento no respeito hosi mundu internasional.
  • Governo mos introduz reforma iha area saúde ho introdusaun modelo seluk atu atende acesso ba saúde hosi ita nia populasaun. Governo tau ossan hodi fo prestasaun ba servisus de saúde bázika gratuita, inklui konsultas no aimoruk, no mos fo assistensia financial ba rai liur ba Timor oan nebe labele hetan tratamento saúde iha rai laran.
  • Governo ida ne mos apoio ba fakuldade de saúde ho apoio hosi governu Kuba iha Universidade Nacional Timor-Leste, atu komplementa Timor oan sira nebe hasai kursu medicina.
  • Sistema de saúde mos introduz SISCa (Sistema Integrado ba Saúde Comunitária) hodi bele presta servisu ba ita nia nia populasaun iha baze. Programa ida ne disponibiliza servisus de saúde báziku nebe fasilita maluk sira iha area rural atu bele hetan asessu ba saúde báziku.
  • Ita seidauk perfeito, maibe ita halo dadaun no ita halo duni. Tanba ne projecto boot iha konstrusaun de estado ne seidauk to rohan.
  • Iha governasaun liu neba, sistema administrasaun da justisa mos komessa hatuur ona plataforma bázika hodi hadia aan ho preparasaun planu estratégico seitor justisa nian. Programa ida ne prepara metas nebe diak atu hadia no melhora ita nia administrasaun da justisa hahu hosi hadia lei sira nebe iha, fo atensaun ba edukasaun sivika, melhora kondisoens ba resolve assuntu rai no disputas rai nian, introduz levantamento dados rai nian, eleva kualidade de servisu prisionais, hadia sistema no atendimento public konaba registo no notariado, no mos fo formasaun ba ema atu sai juízes, Prokuradores, defensores públicos, advogados privadus no mos konservadores no notarios.
  • Foin dadaun governo passa tan ona lei sobre estabelecimento Policia Cientifica de Investigacao Criminal (PSIC) nebe sei haforsa liu tan servisus Ministerio Publico nian iha are investigasaun criminal hodi kompleta servisu nebe, PNTL, Policia Imigrasaun, CAC halo.
  • -Ita reconhece katak sei preciza buat barak iha area justisa, liu liu iha tribunais no servisus de investigasaun, formasaun no kapasitasaun de rekursus humanus iha area magistratura, harii tan Tribunal Supremo da Justica, no seluk tan, maibe preparasaun halao namanas hela, ita lao dadaun hela.
  • -Iha area legislasaun nian, ita seidauk aprova leis lobuk ida hanesan leis Anti-Corrupcao, Lei de Droga, Lei konaba Registo Civil, Lei Menóres sira nian, lei konaba ordenamento território no Lei Rai nian.
  • Nune, ita preciza harmoniza leis nebe iha ona hanesan código penal, CPP, código Civil ho CPC atu bele akomoda assuntos balun nebe sociedade inciste atu hatama. Assuntos balun relaciona ho kestaun kumprimento ho ordem financeira internasional, assunto hanesan incesto, assunto hanesan reconhecimento ba casamento religiosos seluk, ho seluk tan.
  • Maibe ita tenki orgulho katak ita bele halo reforma ida nebe lalais tebes, no ho CNRT nia lideransa mak buat sira ne hotu mossu. Foin dadaun, Primeiro Ministro Portugues, Pedro Passo Coelho, kongratula Timor-Leste liu hosi PM Xanana Gusmao ho lia fuan, parabens, muitas coisas estão a ser feitas ao mesmo tempo.
  • Ita mos hatene katak maioria populasaun rural nia fonte de rendimento mai hosi produsaun agrícola. Iha tinan hirak ne nia laran governu buka introduz método oin-oin hodi diversifika ai-han ho produtos seluk, atu bele ajuda komunidade sira sai hosi meio de subsistensia atu bele aumenta produsaun agrícola no eleva sira nia receitas ka rendimento. Maske seidauk iha resultadu ida nebe ita hotu hakarak, introdusaun teknika agrícola moderna iha karaik komessa hahu ona no espera sei diak liu tan iha futuru.
  • Iha ambitu infraestrutura, nudar prioridade nebe boot liu iha PED nian, ita komessa hadia projecto konstrusaun ba estradas nacionais. Projecto sira ne halo ho apoio instituisoens financeiras mundiais balun no mos hosi apoio governo estrangeiro balun. Estradas tenki loke duni hodi fasilita transportasaun ema no sasan entre distritos no mos fasilita merkadoria produtos hosi area rural ba sentru de merkadu iha areas urbanas. Estradas sira ne mos sei fasilita processo dezenvolvimento nasional nebe komessa mossu tan ona.
  • Ohin loron, iha lideransa nasional ida nebe forte iha CNRT nia mahon, ita konsegue elektrifika mais de 80% hosi ita nia territorio tomak. Koalia bosok karik ita bele dehan katak ita iha hela rohan hosi jornada ida nebe lori naroman ba Timor oan tomak, depois de séculos de kolonizasaun no séculos de obscurantismo. Barak sei preciza halo atu kompleta projecto boot ida ne, no ita sei halo nafatin. Tanba ne preciza lideransa nebe forte hodi kompleta jornada ida ne; ita tenki fiar aan nafatin.
  • Ita orgulho katak ita bele herda hela pedagógia politika ba lideransa foun nebe sei mossu mai; katak hakuak metin Estabilidade Nacional, Unidade Nacional no hanoin atu Dezenvolve ita nia rain no hadia povo nia moris mak sai doutrina nebe Timor oan hotu tenki kaer metin. Katak interesse privadu ka pessoal tenki tau iha kotuk bainhira estadu nia interesse mossu.
  • Iha área educasaun, ita halao hela reforma lobuk ida. Educacao primária gratuita ba ita nia oan sira hatudu governu nia kompromisso boot iha area ida ne, katak laiha ema ida mak labele hetan oportunidade atu asessu ba eskola. Governu mos tau ossan barak iha merendea eskolar ho intensaun atu bele eleva kualidade nutrisaun ho saúde ita nai oan sira nian.
  • Maibe iha area edukasaun, ita sofre redusaun makaas iha infraestrutura tanba konflito naruk no tenki hadia fila fali. Ita mos hasoru estragus nebe ita rasik mak halo ba infraestrutura hirak ne, tanba deit ema balun ladun kumpriende saida mak patrimonio estadu nian. Maibe estruturasaun educacao iha encino superiores, secondário ho primária nebe ita hari ona, maske sei iha problemas barak, komessa hadia didiak no ho tempo ita sei bele eleva kualidade de educasaun ida nebe bele responde ba necessidade dezenvolvimento nacional.
  • Governo mos kria Fundo Dezenvolvimento Capital humano (FDCH) nebe apoia Timor oan barak no apoia selu périto sira atu forma no kapasita ita nia ema iha area oin-oin iha rai laran no mos iha rai liur. Edukasaun mak sai xave fundamental ba dezenvolvimento nasaun ida ne, no ita espera ho FDCH it abele hadia diak liu tan kualidade de Encino iha ita nia escolas ho universidade sira.
  • Ho apoio misaun Katolika nian iha area edukasaun, nebe Igreija hatudu ona nudar pioneiro desde tempo colonial to ohin loron ho kualidade nebe diak, ita espera matenek barak sei mossu nafatin mai, la konta ho sira nebe mak hetan bolsa no eskola hela iha rai liur.
  • Tanba ne hotu, ho tanba konfiansa ba lideransa, no tanba konfiansa ba partido no programs no reformas nebe halao ona maka ita hetan apoio inkondisional atu sai partido mais votadu iha 2012.
  • Ida ne hatudu katak, konsiensia politika ita nia povu nian komessa muda, katak iha ambitu independensia nian, ita tenki hanoin ba oin no vota ba partido nebe hatudu programa diak, nebe fo impaktu positivu ba hadia povu nian moris. Karik CNRT hakarak vida naruk no permanence iha vida politika Timor nian no hetan nafatin Timor oan nia apoio, ita tenki kaer metin principios hirak ne.
  • Povo mos konsiente dadauk ona katak slogan no propaganda politika nebe baratu, uza povu nia kosar-ben hodi buka poder sei laiha folin. CNRT iha ambitu ukun aan tenki hare ba oin, hodi prienche independencia no nacionalismo, sentido patriótiku no determinisaun.
  • Povo ne konsiente katak sira labele fo deit votos ba partidu nebe mak laiha programa nebe konkretu ho lideransa nebe la fo konfortabilidade ba povo ho nasaun nia sobrevivensia, no la hatudu dedikasaun atu hadia povu nia moris.
  • Konfiansa ba partido, sobretudo konfiansa ba lideransa partidu nian ne, labele monu let deit iha rai, no ita konferensista sira ohin iha ne, iha mandato moral no politiku atu responsabiliza ba ita nia votantes sira, sobre konfiansa nebe mak sira fo mai ita nia partidu iha eleisaun 2012.

 

  • Povo hatudo ona ba partido ida ne liu hosi eleisoens sira liu ba katak ho lideransa ne be diak no programa nebe bele lori moris diak ba povo, sira sei la hosik monu ba rai. Tanba ne ita tenki asegura povo nia konfiansa, no labele hosik monu let deit ba rai.

Konjunctura Politika post eleisaun 2012

  • Iha post-eleisaun 2012, konfigurasaun politika nasional muda kompletamente. Atmosfera politika konfrontativa nebe ita hasoru iha 2007-2012 nakfilak aan ba toleransia alargada ho kumpriensaun mútua entre forsas polítikas iha parlamento hamutuk hodi hanoin ba interesse nasional.
  • CNRT mak prezide governo ho partidu rua seluk (PD ho Frente Mudansa).
  • Liu hosi lideransa histórica sira, ita aprende tan lisaun politika nebe nakonu ho toleransia entre governo ho opozisaun, no ao mesmo tempo, respeita nafatin idak-idak nia knaar. Ita tenki fo parabens ba lideransa CNRT ho nia aliadu sira iha parlamento ho governo, mais ita aplaude mos partido opozisaun Fretilin nebe hatudu maturidade politika, hodi konsentra ba dezenvolvimento no sai parceiru kritiku nafatin hodi kontrola ho forma demokratika lalaok no klalaok governasaun no membros governus sira.
  • Klaru ke iha ema nebe la gosta mudansa de pozisaun ida ne, maibe ita agradece tebes ba lideransa partidu opozisaun katak nudar partidu ida nebe nia  associa íntimamente ho nasaun ida ne nia fundasaun, ita haluan no habelar liu tan “saida mak sentido de estadu”, saida mak interesse nasional no saida mak povo nia moris diak.
  • Laos deit tanba ita aprova unanimamente orsamento estado dala-rua iha parlamento nacional, maibe tanba ita buka hamosu kultura politika foun iha momento ida krusial iha nasaun nia moris.
  • Iha nível internacional, Timor Leste desempenha papel fundamental iha nasaun G7+ nebe halibur paíz recepientes sira iha mundu atu enkoraja doador sira labele impoen sira nia hakarak ba ita bainhira fo apoio maibe tenki rekonhece ita, nudar nain ba dezenvolvimento …  Kay Rala Xanana Gusmao nia dezempenho iha forum Economia regional Asia ho Pacifico; papel nebe nia desempenha hamutuk ho Dr Marie Alkatiri iha Guine Bissau, no ikus mai, desempenho ema hanesan Eis Presidente Parlamento Dr Francisco Guterres “Lu-Olo” iha preparasaun ba Cimeira CPLP iha Dili iha fulan Julho 2014, aumenta liu tan kredibidade internasional ba Timor nian ho nia lideransa.
  • Tinan rua mai ne, ita sei lidera CPLP pela primeira vez, no ida ne laos tanba ita matenek no barani deit maibe mos tanba kualidade de lideransa ho kapacidae atu introduz programas inovativas atu dudu organizasaun ne sai hosi cículo de pensamento convensional, mak ema fo fiar ita. Maibe Timor oan sira tenki hotu apoia iniciativa ida ne no servisu makaas liu tan iha tinan rua mai ne, hodi alkansa ojectivus nebe ita introduz durante lideransa Timor-Leste.
  • Ita lebele haluhan katak ita luta hela atu tama ba ASEAN – mos importante –, no  kualidade ida atu bele tama organizasaun ida ne mak estabilidade no karakter lideransa nebe forte. Tanba ne, ita labele halimar ho lideransa nasaun ne nian.
  • Ita mos hasoru hela desfiu boot hosi kompanhia petróleo naran Connoco Philips nebe, hanoin ita beik. Buka evita atu selu taxa (imposto) ba estado Timor-Leste mais kontinua explora ita nia mina rai, ita nia riku soin. Aat liu tan, uza meio oin-oin atu lohi ita konaba gestaun de rekurus iha Tasi Timor. Tanba deit sira nia matenek, sira uza instrumentos legais sira nebe ita kompromete iha tempo dificil, atu explora ita nia mina, la selu tan ita nia taxa maibe hakarak hatama tan ita ba Tribunal.
  • Se laiha lideransa politika ida nebe forte no matenek, parece ita lakon tiha ona milháres de dólares nebe semo let deit ba kompanhia sira nebe mai lohi atu ajuda ita, maibe hakarak mos hadau ita nia ruku soin.
  • Ita nia problemas uma laran hanesan halo ajustamento ba pensaun vitalisia no introduz sistema re-call iha regimento parlamento nacional nian, nebe Congresso CNRT 2011 rekomenda seidauk alkansa. Partido mos tenki hare preokupasaun konaba korupsaun nebe tuir presepsaun sosiedade sivil sei aas tebes no buka maneiras atu kombate.
  • Ita nia estradas halo dadauk ona no lao ho diak, maibe seidauk abranje ba território tomak, nune mos ho eletricidade nebe 20% hosi ita nia populasaun seidauk hetan.
  • Ita mos foin mak komessa projecto ekonomia social e merkadu no seidauk tama ba iha imlementasaun lolos, por enkuanto iha 2015 ita se hasoru biban boot ka komemora 500 anos ita nia relasaun ho Portugueses sira no possivelmente vizita amo Papa mai Timor;
  • Ita nia crescimento economia iha sector real sae dadaun ona, maibe seidauk signficado no preciza nafatin guia liu-liu ba implementasaun PED nebe Kay Rala Xanana Gusmao nudar president CNRT no Primeiro Ministro governo Aliansa Maioria Parlamentar (AMP) ho Bloku Koligasaun (BK) rasik mak introduz, nebe engloba mehi Timor oan tomak nian;
  • Mesmo ke ita nasaun riku, maibe ema barak mak sei kiak;
  • Ita nia experiencia iha estabilidade seidauk tasak. Mesmo ke ita iha aparelhos da seguransa nebe diak dadaun no forte, ita preciza eleva sira nai kualidade.  Estabilidade nebe ita iha to ohin loron no rekonhecimento internasional nebe ita hetan, ita labele nega maibe tanba mos konfiansa ba lideransa nebe forte;
  • Ita iha ona estabilidade, ita iha ona enkuadramento legal konstitusional nebe bele sai baze atu garante estabilidade governativa. Maibe ita mos tenki konfessa katak, ita sei iha problema ho maturidade liu-liu sei hasoru krize konaba “sentidu de estadu”. Assuntos sira ne laos sai preokupasaun deit, maibe preciza akompanhamento, liu-liu iha encruzilhada ida ne, transisaun hosi lideransa tuan ba lideransa foun.
  • Ita nia instituisaun democratiko sira harii hotu ona, no komessa forte ona maibe preciza acompanhamento atu bele metin liu tan, pelo menos iha tinan tolu mai ne.
  • Hau sublinha iha seitor justisa, mesmo ke ita nia magistradus ho defensores sira nebe mesak foin sae halo esforso makaas atu servisu ho profissionalismo, sempre iha tentasaun hosi grupos iresponsaveis sira atu influensia profissional sira ne, ba sira nia interesse. Hau garante katak mesmo ema barak kritika ita nia instituisaun Judiciario sira no orgauns Judicial seluk, ita nia ema sira mesak diak deit.
  • Ita tenki kuidadu mak aktus ema irresponsaveis nebe tenta uza meio oin-oin hodi explora falta de esperiencia iha nia autor judicial sira iha Triunais, Policia no organus hanesan Comissao Anti Korrupsaun, ho razoesn hanesan explora sentimento public, ikus mai hodi atinji sira nia interesse;
  • Motivasaun importante nebe ezige ita atu pondera didiak katak iha transisaun ka encruzilhada polítika nebe nasaun hasoru dadauk, hosi gerasaun ida ba gerasaun seluk, ita tenki halo ho kautela, hodi konsidera medidas no problemas no preokupasaoens hotu hotu atu minimiza riscos, tanba –ao fim ao cabo – povo no nasaun nia interesse mak ita debate dadaun ne.
  • Tanba ne, ita sei hasoru hela desafiu boot lobuk ida, laos iha rai laran deit maibe mos iha rai liur. Ho konfigurasaun politika nebe lao dadaun, ho koperasaun forsa politika hotu iha parlamento nacional, ita tenki buka tane uluk mak interesse nasional. Ita tenki kesi futu-kabun hamutuk atu defende ita nia rain, hadia instituisoens de estado, eleva kualidade no determina prioridades iha dezenvolvimento, hadia liu-tan recursos humanus no hametin sentidu de estado ba Timor oan tomak. Tanba ida ne, prezensa lideransa historicos sira laos necessario deit maibe indispensavel.
  • Nudar partido, ohin ho aban ita tenki hamutuk, laos tanba deit intensaun ita nia maun boot Xanana hakarak transfere ona poder ba gerasaun foun, maibe tanba preokupasoens barak nebe ita hasoru iha processo da konstrusan da nasaun, nebe sei preciza nia ho sira seluk nia apoio nudar mata-dalan atu hatudu dalan no guia ita nudar nasaun soberanu, forte no moris ho nivel ida hanesan mos nasaun seluk iha mundo.
  • Konferencista sira, tanba preokupasoens sira ne hotu, tanba razoens sira sublinha iha leten, mak ohin ita hamutuk iha ne hodi deside, no tenki deside ho kalma, dedikasaun no determinasaun, hanesan experiencia asswain ho lideransa funu nian, no inan-feluk ida nebe temi iha leten, hatudo ona durante tinan hat-nulu nia laran. Fiar Aan Lao ba Oin.

VIVA CNRT

VIVA KAY RALA XANANA GUSMAO

VIVA TIMOR LESTE

 

Last modified on Thursday, 04 December 2014
  • 0 comment
  • Read 4984 times

Leave a comment



Anti-spam: complete the taskJoomla CAPTCHA

About us

Depois Presidente Fretilin Nicolau Lobato mate iha 31 Dezembro 1978, Funda­dor Fretilin no membru Comite Central Freti­lin ne’ebe salva a’an iha rai liur “ la iha tan mehi ba ukun a’an”. Tamba husi 31 Dezem­bro 1978 to’o 1983, iha tinan 5 nia laran, Fundador Fretilin lahatene los se mak bele hatutan funu ne’e. Mari Alkatiri hanesan mos fundador Fretilin ida, ba Jurnalista Timor Post iha dia 04 Janeiro 2010 hateten katak “wainhira rona katak Nicolau Lobato mate, ami dehan agora saida mak atu akontese, ami komesa hare senariu bara-barak se mak atu troka Nicolau Lobato..

Contact us

Informasi seputar kegiatan Partido CNRT, silahkan hubungi salah satu kontak di bawah ini:

  • Address : Dili Timor Leste

  • Email : This email address is being protected from spambots. You need JavaScript enabled to view it.

  • Phone1 : +67078461438
    Phone2 : +67077846639

OJP, KMP & KP